Տարբեր ժամանակաշրջաններում ստեղծագործող սփյուռքահայ գրողների գործերն արդեն մի քանի տարի հրատարակվում են «Սփյուռք» մատենաշարում։ Գրականագետ, գրող և սփյուռքագետ Արթուր Անդրանիկյանը մատենաշարում ներկայացված գրողների գործերի ուսումնասիրությամբ է զբաղվում տարիներ շարունակ:
«Սփյուռքյան գրողները մի քանի խմբի են բաժանվում. նրանք, ովքեր ներկայացված են եղել սովետահայ գրականության մեջ, ինչը բացատրվում էր այդ համակարգի հետ նրանց ունեցած վերաբերմունքով: Եվ գրողներ, որոնք բարձրարժեք գործեր էին ստեղծում, սակայն մուտք չունեին սովետահայ գրականություն՝ իրենց գաղափարների պատճառով», — ասում է սփյուռքագետը:
Նա բազմաթիվ ուսումնասիրություններ է արել, բացահայտել այնպիսի գրողների, որոնց մասին չգիտեն անգամ սփյուռքում: «Շատերը Սփյուռքում իմ գործունեությունը քննադատում են, շատերը՝ քաջալերում՝ ասելով, որ այդ բացահայտումները հայ գրականության զարգացմանը մեծ նպաստ են բերում», — նշում է Արթուր Անդրանիկյանը:
Գրականագետն ասում է՝ սփյուռքի գրողներին բացահայտելով՝ հնարավոր է պատկերացում կազմել տվյալ ժամանակաշրջանի հայ մարդու ապրած կյանքի ու պատմության կերտման մասին:
