Քայլիր, որ քայլեն. մեկ քայլը՝ մեկ դրամ

Պատահե՞լ է, որ հաշվեք, թե քանի քայլ եք անում, ասենք, կանգառից կամ կայանած մեքենայից մինչև աշխատավայր հասնելը։ Մենք դա սովորաբար չենք անում, որովհետև․․․ դե, ի՞նչ կարևոր է։ Բայց մի քանի հարյուր մարդ 2 օր է՝ հաշվում է կատարած ամեն քայլը, քանի որ 1 քայլը 1 դրամ է, այն էլ՝ շատ կարևոր գործի համար։

Բարեգործական արշավ-մրցույթի շրջանակում քայլորդի ամեն քայլին համարժեք գումար է փոխանցվելու reArmenia հարթակում տեղադրված MetaGait նախագծին: Արդյունքում արտադրվելու են այն սարքավորումները, որոնք զինհաշմանդամություն ձեռք բերած զինվորներին օգնելու են վերականգնողական բուժում անցնել ու կանխարգելել 30-ից ավելի հիվանդությունների առաջացման ռիսկը։