Բրիտանական BBC հեռարձակող կորպորացիան բանակցություններ է վարում Twitter-ի հետ՝ «որքան հնարավոր է շուտ» լուծել «կառավարության կողմից ֆինանսավորվող լրատվամիջոց» սոցցանցում նշագրումը հեռացնելու հարցը, հայտնում է ամերիկյան CNN հեռուստաալիքը։
Խոսքը BBC-ի Twitter-ի էջի մասին է, որն ունի 2,2 միլիոն հետևորդ և ներկայումս կրում է «Կառավարության կողմից ֆինանսավորվող լրատվամիջոց» պիտակը:
Այնուամենայնիվ, այս նշանը չի երևում BBC-ի Twitter-ի այլ օգտահաշիվներում, այդ թվում՝ BBC News-ի (World) (39,7 մլն հետևորդ) և BBC Breaking News-ի (51,6 մլն հետևորդ): Twitter-ը սահմանում է պետական մեդիան որպես լրատվամիջոց, երբ պետությունը վերահսկում է խմբագրական բովանդակությունը ֆինանսական ռեսուրսների, ուղղակի կամ անուղղակի քաղաքական ճնշման և/կամ արտադրության և տարածման նկատմամբ վերահսկողության միջոցով:
«Մենք Twitter-ի հետ բանակցություններ ենք վարում, որպեսզի հնարավորինս շուտ լուծենք այս խնդիրը: BBC-ն միշտ եղել և մնում է անկախ: Մենք ֆինանսավորվում ենք բրիտանական հանրության կողմից՝ արտոնագրային վճարի միջոցով»,- CNN-ին ասել է BBC-ն:
Միաժամանակ, մարտին Մեծ Բրիտանիայի արտաքին գործերի նախարարությունը հայտարարել էր, որ բրիտանական իշխանությունները BBC հեռուստառադիո կորպորացիային հատկացրել են 20 մլն ֆունտ ստեռլինգ՝ աջակցելու անգլերեն լեզվով հեռարձակմանը և ապատեղեկատվության դեմ պայքարին: Նշվում է, որ այս որոշումն ընդունվել է անցած տարվա իրադարձությունների, մասնավորապես ուկրաինական հակամարտության ֆոնին։
Twitter-ի վարչակազմը 2020 թվականին սկսել է պիտակավորել լրատվամիջոցների այն էջերը, որոնք, իր կարծիքով, գտնվում են իշխանությունների վերահսկողության տակ։ Պիտակ են կրում նաև ՄԱԿ-ի Անվտանգության խորհրդի մշտական անդամների, հիմնական պետական պաշտոնյաների, ներառյալ արտաքին գործերի նախարարների, դեսպանների և բարձրաստիճան դիվանագիտների հաշիվները:
