Լենա Բադեյան
«Ռադիոլուր»
Եթե Վարդան Օսկանյանին վերաբերող հարցն այսօր բոլորն ընկալում են իբրեւ քաղաքական պատվեր, ապա կա՞, արդյոք, որեւէ հարց, որի համար 10 տարի արտգործնախարար աշխատած Օսկանյանը պետք է պատասխան տա:
«Մեղադրել ինչ որ բանում կարելի է, երբ մարդը գործողություն է կատարել, իսկ Օսկանյանն իրականացրել է ղեկավարության ուղեգիծը»,- «Ռադիոլուրի» հարցին պատասխանելով այսօր նշեց «Նոր ժամանակներ» կուսակցության ղեկավար Արամ Կարապետյանը՝ հավելելով, թե քաղաքական տեսանկյունից շատ հարցեր ունի Օսկանյանին:
«Նոր ժամանակների» ղեկավարի համոզմամբ՝ Վարդան Օսկանյանը նախագահի ընտրություններում չի կարող հանդես գալ որպես առանձին թեկնածու, քանի որ քաղաքականապես շատ խոցելի է:
Իսկ թե ինչու են ցանկանում Վարդան Օսկանյանին զրկել պատգամավորական անձռնմխելիությունից, Արամ Կարապետյանի վերլուծություններով, դրա համար կա երեք սցենար՝
ամեն դեպքում իշխանությունը Օսկանյանին փորձում է դարձնել նախագահի թեկնածու,
ստիպում են «Բարգավաճ Հայաստանին» քաղաքականապես կողմնորոշվել, թե որ դաշտում է գործելու,
գոյություն ունի արտաքին գործոնը՝ ԲՀԿ- ի ռուսամետ ուղղության հետ կապված:
Ինչ զարգացում էլ որ ապագայում լինի, Արամ Կարապետյանի համոզմամբ, նման սցենարները առաջին հերթին վատ դրության մեջ են դնում երկիրը եւ վարկաբեկում այն:
Այն, ինչ այսօր կատարվում է Հայաստանի ներքաղաքական դաշտում եւ կառավարությունում Արամ Կարապետյանը բացառապես կապում է նախագահի առաջիկա ընտրությունների հետ:
Ի դեպ՝ ընդդիմադիր այս գործիչը պատրաստվում է այս անգամ էլ առաջադրվել նախագահի թեկնածու, համոզված է. գրանցման հետ կապված կրկին խնդիրներ ունենալու է, զգուշացնում է, որ լրջորեն է պատրաստվել բոլոր հնարավոր խոչընդոտներին, բայց տեղյակ է նաեւ, որ իրեն չեզոքացնելու համար էլ են որոշ ուժերը պատրաստվել եւ շատ գումարներ ծախսել «կոմպրոմատներ» ձեռք բերելու համար:
