Չինական նոր տարվա օրը՝ փետրվարի մեկին, Պեկինում բացվել է «Օլիմպիական զինադադար» որմնանկարը, հայտնում է միջազգային օլիմպիական կոմիտեն (ՄՕԿ): Մասնակից մարզիկներն ու պաշտոնյաները ստորագրել են որմնանկարը՝ ցույց տալով սպորտի միջոցով խաղաղ աշխարհ կառուցելու նվիրվածությունը:
Արարողությունը տեղի է ունեցել չինական նոր տարվա օրը օլիմպիական ավանում։ Միջոցառմանը ներկա են եղել ՄՕԿ-ի ղեկավար Թոմաս Բախը և ձմեռային 24-րդ խաղերի կազմկոմիտեի փոխնախագահ Յան Շուանը։
«Աշխարհի լույսը» որմնանկարը խորհրդանշում է լույսը, խաղաղությունն ու վերամիավորումը։
«Այսօր չինական նոր տարին է և բարենպաստ պահ է՝ օլիմպիական զինադադարի որմնանկարը բացելու համար,-ասել է ՄՕԿ-ի առաջնորդ Թմոաս Բախը,-Առաջիկա օրերին դուք կմրցեք միմյանց հետ, հարգանքով կապրեք օլիմպիական ավանի նույն հարկի տակ:
Դուք ցույց կտաք, թե ինչպիսին կարող է լինել աշխարհը, եթե մենք բոլորս հարգենք նույն կանոնները և միմյանց: Դա է իսկական օլիմպիական ոգին, խաղերի ուղերձը՝ միավորել աշխարհը մրցակցության մեջ։ Հրավիրում եմ ստորագրելու օլիմպիական զինադադարի որմնանկարը:
Կոչ ենք անում աշխարհի բոլոր քաղաքական առաջնորդներին հավատարիմ մնալ Օլիմպիական զինադադարին»:
Օլիմպիական զինադադարի առաջին որմնանկարը տեղադրվել է Թուրինում՝ 2006թ. ձմեռային օլիմպիական խաղերի ժամանակ:
