Լիրան շարունակում է գահավիժել․ ևս մի գործոն՝ Թուրքիայից ներկրման արգելքը երկարաձգելու օգտին

Թուրքական ապրանքների ներկրման արգելքը  երկարաձգելու  հարցը քննարկելիս պետք է հաշվի առնել նաև թուրքական լիրայի արժեզրկման գործոնը ՝  «Ռադիոլուրի» հետ զրույցում ասել է  տնտեսագետ Արմեն Քթոյանը՝  ընգծելով, որ գերէժան լիրան էժանացնում է թուրքական ապրանքները դրսի շուկաներում։

«Լիրայի արժեզրկումը ևս մեկ փաստարկ  է  թուրքական ապրանքների ներկրման արգելքը երկարաձգելու օգտին, քանի որ հակառակ դեպքում թուրքական ապրանքները կդառնան 2-3 անգամ ավելի էժան, քան մինչև արգելքը սահմանելն էին։ Այդ պարագայում հայրենական որևէ արտադրություն դրանց հետ մրցակցել չի կարողանա։ Պետք է փորձենք ռիսկերը գնահատել և հավասարակշռված քայլերի գնալ», – նշել  է տնտեսագետը։  

Թուրքական արժույթը դարձյալ  թարմացրել է պատմական նվազագույն ցուցանիշը` հատելով մեկ դոլարի դիմաց 14 լիրայի սահմանը։  Մեկ տարվա ընթացքում թուրքական արժույթն էժանացել է շուրջ 40%–ով։

Թուրք  ընդդիմադիրները   երկրի նախագահին մեղադրում են ոչ կոմպետենտության  մեջ՝  կոչ անելով արտահերթ ընտրություններ անցկացնել լիրայի փոխարժեքի ռեկորդային անկման ֆոնին։ Էրդողանը հակադարձում է՝   ընտրությունները կանցկացվեն նախանշված ժամկետում` 2023 թվականի հունիսին։

Ավելին, Թուրքիայի նախագահը  հայտարարում է տոկոսադրույքի նվազեցման քաղաքականությունը շարունակելու մասին։

Ի՞նչ գրավչություն է Էրդողանը փորձում ստեղծել` Թուրքիան որակելով ցածր տոկոսադրույքների երկիր , իրականում ի՞նչ մարտահրավերների առջև է թուրքական տնտեսությունը և  Հայաստանում թուրքական ապրանքի ներմուծման արգելքը վերացնելու դեպքում ինչ վտանգի առաջ կկանգնի հայաստանյան տնտեսությունը․ հարցերի շուրջ «Ռադիոլուր»–ը զրուցել է տնտեսագետ Արմեն Քթոյանի հետ։