Իրանը թույլ չի տա տարածաշրջանում քարտեզի և սահմանների որևէ փոփոխություն` ՌԴ ԱԳՆ Սերգեյ Լավրովի հետ համատեղ մամուլի ասուլիսի ժամանակ ասել է ԻԻՀ ԱԳ նախարար Հոսեյն Ամիր Աբդոլլահիանը:
«Մենք չենք հանդուրժի Հարավային Կովկասում որևէ աշխարհաքաղաքական փոփոխություն, ինչպես նաև քարտեզի փոփոխություն։ Մենք լուրջ անհանգստաություն ունենք տարածաշրջանում ահաբեկիչների ներկայության առումով»,-ընդգծել է Աբդոլլահիանը։
Մոսկվայում մեկնարկած Ռուսաստանի և Իրանի ԱԳ նախարարների բանակցություններում երկու երկրների արտաքին գերատեսչության ղեկավարները քննարկել են երկկողմ և միջազգային օրակարգի հարցերի լայն շրջանակ:
ՌԴ ԱԳ նախարարը հայտարարել է, որ երկու երկրների միջև տարբեր մակարդակներում ինտենսիվ քաղաքական երկխոսություն է ընթանում։
Նրա խոսքով ՝ համագործակցության նոր վեկտորը կդառնա Իրանի միացումը Շանհայի համագործակցության կազմակերպությանը (ՇՀԿ) ՝ որպես լիիրավ անդամ:
Այս գործընթացի մեկնարկի մասին համապատասխան որոշումն ընդունվել է վերջերս Դուշանբեում կայացած ՇՀԿ գագաթնաժողովում:
Պայմանավորվածություն է ձեռք բերվել ՌԴ և Իրանի նախագահների հանդիպում կազմակերպելու ուղղությամբ։
Իրանը ՌԴ-ին համարում է ստրատեգիական գործընկեր։
«Մենք ցանկանում ենք ընդգծել, որ մեր նոր կառավարության բարիդրացիական քաղաքականության մեջ, իհարկե, Ռուսաստանը մեր առաջնահերթությունն է»,-նշել է Իրանի ԱԳ նախարարը:
