Ադրբեջանի Հանրապետությունը Արցախի Հանրապետության դեմ հարձակողական օպերացիայի օդային ղեկավարումը հանձնեց Թուրքիայի ռազմաօդային ուժերին: Հայտնում է ՀՀ ՊՆ ներկայացուցիչ Արծրուն Հովհաննիսյանը իր ճեպազրույցում։
Այսօր ժամը 10:00-ից սկսած Թուրքիայի Հանրապետության օդուժի՝ Քյուրդամիրից թռիչքներ իրականացնող երկու F-16 կործանիչները, ինչպես նաև ադրբեջանական օդուժի ՍՈՒ-25 տիպի գրոհիչները, «Բայրաքթար» տիպի հետախուզահարվածային ԱԹՍ-ը մեծ բարձրությունների վրա հրթիռառմբային հարվածներ են հասցրել Արցախի Հանրապետության Հադրութի և Մարտունու շրջանների բնակավայրերին:
Օդուժը գործում է թուրքական E7-T օդային հեռավար հրամանատարական կետի կառավարմամբ Էրզրում Ղարս հատվածից:
Հավանական է, որ Թուրքիայի ռազմաօդային ուժերի ղեկավարությունը գտնվում է ինքնաթիռի մեջ:
Բացի այդ, Հադրութի շրջանի սահմանից որոշակի խորության վրա գործում է թուրքական ԱԹՍ հրամանատարական կետը, որն անմիջական ղեկավարում է ադրբեջանական հարվածային ինքնաթիռների կրակը:
Օրվա ընթացքում մեր զորքերը հերոսաբար հետ են մղել Ադրբեջանի փոփոխված մարտավարությամբ գրոհները, հիմնական կիզակետում եղել է հյուսիսը և հարավը, ասել է Արծրուն Հովհաննիսյանը։
Երեկվա տվյալներից հետո Ադրբեջանն իր տապալված գործողությունների արդյունքում կրել է հետևալ վնասները
- 139 զոհ
- 200 վիրավոր
- հայկական կողմը խոցել է 29 տանկ և զրահատեխնիկա
- 3 ծանր հրանետային տեխնիկա (ՏՈՍ)
- 1 ՍՄԵՐՉ
- 11 ԱԹՍ
Տվյալները կարող են որոշակիորեն փոփոխվել, քանի որ մարտերը շարունակվում են, դրանք փոփոխական են, տարբեր ինտենսիվությամբ, տարբեր ուղղություններով, նշել է Արծրուն Հովհաննիսյանը։
