Ֆեյսբուքյան մի քանի օգտատերեր երեկ ահազանգել էին, որ հրդեհ է բռնկվել Սևան- Հրազդան կասկադի «Արգել» կամ, որ ավելի հայտնի է Գյումուշի, հիդրոէլեկտրակայանում։ Հրդեհը մարվել է ժամանակին, ՀԷԿ չի հասել, սակայն վնասներ կան։
Հրդեհ, այն էլ ջրերով պատված տարածքում, այն էլ Վարդավառին, դժվար է պատկերացնել։ Վատ լուրը շուտ է տեղ հասնում․ հայտնի ասացվածքի օրինակով Կոտայքի մարզի Արգել համայնքի ղեկավար Մաթևոս Ավագյանը նախօրեին երեկոյան զանգ ստացավ ու շարժվեց դեպի գյուղի վարչական տարածքից դուրս գտնվող բոլորին հայտնի Գյումուշ ՀԷԿ-ի տարածք։ Մինչ այդ, ֆեյսբուքյան օգտատերերից մեկն արդեն տեսանյութ էր տարածել ու նշել, որ վառվում է Սևան-Հրազդան կասկադի Գյումուշ ՀԷԿ-ը։
Հրդեհ իրականում կար, սակայն, բարեբախտաբար, ՀԷԿ-ը չէր այրվում.
«Տրանսֆորմատորն է վառվել, հրշեջները եկան հանգցրեցին։ Նյութական մի փոքր վնաս է եղել , ուրիշ ոչ մի բան, չեն կարողանում պարզել պատճառները։ Մասնագետները այժմ այդ ուղղությամբ են աշխատում»,- ասում է համայնքապետը։
«Արգել» ՀԷԿ-ի տնօրեն Արթուր Ստեփանյանի խոսքով` կայանին որևէ վնաս չի եղել, այս պահին էլ այն աշխատում է, էլեկտրաէներգիա է արտադրում։ Հրդեհի պատճառը կարճ միացումն էր։ Նման միացումներ հաճախ լինում են, ասում է` շեշտելով` ՀԷԿ- ը 1953 թվականին է շահագործման հանձնվել։
«Նայած ինչի հետ ենք համեմատում վնասները։ Իհարկե, մեծ են, սակայն, եթե ՀԷԿ-ը վնասվեր, ավելի շատ կլինեին վնասները։ Այրվել է մեկ տրանսֆորմատոր։ Եթե ժամանակին չմարվեր հրդեհը, վնասները շատ ավելին կլինեին»։
ԱԻՆ հաղորդագրության համաձայն, այրվել են երկու տրանսֆորմատոր (յուրաքանչյուրը՝ 8 տ յուղի տարողությամբ), հարակից տարածքում գտնվող վարչական շենքի 2-րդ հարկի կառավարման վահանակի սենյակի մեկ պատուհան և փայտյա մանրահատակից մոտ 0․5 քմ հատված: Կանխվել է հրդեհի տարածումը դեպի մյուս 10 տրանսֆորմատորները և «Արգել ՀԷԿ»-ի շինության ներսում գտնվող կառավարման վահանակը:
Արգելի գյուղապետ Մաթևոս Ավագյանը նկատում է՝ իր ղեկավարած համայնքից տեղում աշխատողներ կան։
Հրազդանի ջրամբարի ջրերը թափվում են Սևանի կասկադի ամենախոշոր հիդրոկայանի՝ Գյումուշի տուրբինների մեջ։ Մինչև այդ կայանի ջուրն անցնում է գրեթե 20 կիլոմետր ճանապարհ, որը կազմված է ջրանցքներից ու թունելներից և գահավիժում է 300 մետր բարձրությունից։
Սևան-Հրազդան կասկադի ամենահզոր հիդրոհանգույցը Գյումուշի հիդրոէլեկտրակայանն է, որը Խորհրդային միության ամենախոշոր կառույցներից մեկն է։ Ասում են՝ հիդրոհանգույցն իր ճարտարապետական ձևավորմամբ արտահայտում է խորհրդային տարիներին ապրած մարդկանց ստեղծագործ աշխատանքը։ Գյումուշը կառուցվել է 1953 թվականին։
Միջազգային էներգետիկ կորպորոցիայի գլխավոր ճարտարագետ Գարեգին Բաղդասարյանն արդեն 43 տարի աշխատում է այստեղ, լրագրողների հերթական շրջայցերից մեկի ժամանակ պատմեց․
«Ագելի ՀԷԿ-ը 4 հիդրոագրեգատ ունի, հույժ կարևոր կայան է, Հայաստանի էներգետիկայի համար։ Բջնիի գիծն է այստեղ, որը ուղիղ ատոմակայան է գնում, և որի համակարգի վթարի դեպքում կայանի այդ գիծը ավտոմատ դատարկվում է այլ էլեկտրաէներգիա ընդունող կազմակերպություններից և յուրաքանչյուր ագրեգատ աշխատում է ուղիղ ատոմակայանի հետ՝ սեփական կարիքների ապահովման համար»,- ասաց Գարեգին Բաղդասարյանը։
Նույն օրը Գարեգին Բաղդասարյանը նաև հիշեց 1995թվականի կայանի մեծ վթարն ու, թե ինչպես են վթարի հետևանքները վերացրել․
«Ամեն ինչ նույնն է մնացել` ջահը, լուսամփոփները, որոնք դրել են 1953թվականին, նույնն են մնացել։ Երբ մենք վերականգնում էինք 1995-1999թթ , մտածում էինք, որ ճարտարապետական որևէ լուծումի ձեռք չտանք»։
«Ռուս-Հիդրո»- ընկերությունը ռուսաստանաբնակ հայազգի գործարար Սամվել Կարապետյանի «Տաշիր» խմբին է վաճառել 561 ՄՎտ հզորությամբ Սևան-Հրազդան հիդրոկասկադը շահագործող Միջազգային էներգետիկ կորպորացիայի արժեթղթերի 90%-ը։
