Աստղ մըն ալ շիջեցաւ․ ՀՀ Արուեստի վաստակաւոր գործիչ Ժիրայր Ալթունեան կնքեց իր մահկանացուն

Խոր վիշտով կը տեղեկանանք, որ կեանքէն հեռացած է 74 ամեայ Թ. Ալթունեանի անուան երգի-պարի պետական  անսամպլի գեղարուեստական ղեկավար, Հայաստանի արուեստի վաստակաւոր գործիչ Ժիրայր Ալթունեանը։

Ան իր ամբողջ կեանքը նուիրեց հայ երաժշտական արուեստի զարգացման, մաքրամաքուր մատուցման և պահպանման գործին: Ոչ միայն Հայաստանի  այլև արտասահմանի մէջ ապրող հայութեան համար։

Ժիրայր Ալթունեան ծնած է 1946 թուականի Օգոստոս 23-ին Երեւանի մէջ:

Եղած է 1974-1990 թթ.՝ Թ. Ալթունեանի անուան երգի-պարի պետական համոյթի՝ որպէս գլխաւոր խմբավար: Ժիրայր Ալթունեանի մասնագիտական կենսագրութեան մէջ յատուկ տեղ կը  գրաւէ սփիւռքը. հայ համայնքներու երգչախումբերուն համար իր ստեղծած ծրագիրները իւրայատուկ երանգներով  օժտուած են:

1990-2002 թուականներուն ան  հրաւիրուած է Սուրիա և Իրան , ղեկավարելու Հալէպի՝ «Սպենդիարեան», Դամասկոսի՝ «Քնար» եւ Թեհրանի՝ «Արարատ» երգչախումբերը։

Ժիրայր Ալթունեան 2004 թուականէն մինչ օրս հանդիսացած է Թ. Ալթունեանի անուան երգի-պարի պետական համոյթի գեղարուեստական ղեկավարը:

ԱՆ  համոյթի բազմաթիւ երգերու, պարերու գործիքաւորման հեղինակ է: Անոր աշխատանքները նոր մտածողութեան արդիւնք են՝ միաժամանակ կրելով ժամանակի շունչն ու աւանդականի լաւագոյն յատկանիշները:

Ժիրայր Ալթունեանի անսպառ թեւաւոր միտքերը յաւերժ կը մնան մեր սրտերուն մէջ,  կ՛ապրեցնեն ու  կ՛ոգեշնչեն,   որ սա՛ է Ազգանուէր, հայապահպան եւ արարող Հայու տեսակը։

Խունկ ու աղօթք իր յիշատակին։