Սաթիկ Իսահակյան
«Ռադիոլուր»-Արմավիրի մարզ
Օրերս Արմավիրի մարզում գործող հեռուստաընկերությունների թիվն ավելացավ ևս մեկով, որը մյուսների տարբերությամբ եթեր է հեռարձակում համացանցում, աշխատում է շուրջօրյա և ունի մի քանի հեղինակային ծրագրեր, որոնք տարիներ առաջ հեռարձակվել են ինչպես մարզային, այնպես էլ հանրապետական հեռուստաընկերությունների միջոցով:
Արմավիրի մարզում գործող «Լույս», «ԱԼՏ», «Նոյ Հայաստան» հեռուստաընկերությունների շարքը համալրեց ևս մեկ հեռուստաընկերություն, որը նոր անուն չէ արմավիրցի հեռուստադիտողների համար: Տարիներ առաջ ՄՆՆ հեռուստաընկերությունը Հայաստանի առաջին, երկրորդ, Արմենիա, Շանթ հետուստաընկերությունների լրատվական հաղորդումների միջոցով լսելի էր դարձրել Արմավիրի մարզի հիմնախնդիրները: Որոշակի դադարից հետո հեռուստաընկերությունը դարձյալ հայտնվեց մարզի մեդիա դաշտում, սակայն էլեկրոնային տարբերակով, որն իր հեղինակային հաղորդումները եթեր է հեռարձակում համացանցում և աշխատում է շուրջօրյա:
ՄՆՆ հեռուստաընկերության գործադիր տնօրեն Նաիրի Մանվելյանը նշեց, որ անցած 12 տարվա ընթացքում իրենք գործել են, որպես արտադրող հեռուստաընկերություն. ունեն ժամանցային բարձր վարկանիշ պահովող հաղորդումներ, որոնք չեն կորցրել իրենց արդիականությունը և հեռաևձակվել են մարզային հեռուստաընկերությունների եթերներից, իսկ մայիսի 1-ից դրանք ունեն սեփական եթերի ուրույն տեղերը:
Ասում են` որքան մեծ է մեդիա դաշտը և մամուլը, այնքան քիչ են անտեսված խնդիրները: Կարելի է ասել մարզում հեռուստառադիոֆոտոլրագրողներն ամենուր են և վեր են համում այն խնդիրները, որոնք հուզում են բոլորին: ՄՆՆ անգլերենից թարգմանաբար ժամանակակից, բնական, նորովի բառերի հապավումն է, որն իր խոսքը նորովի ներկայացնելու է համացանցի շուրջօրյա եթերում: Նաիրի Մանվելյանը նշեց, որ ժամանցային մի շարք ծրագրերից բացի կգործի լրատվական դաշտը, որտեղ կընդգրկվեն նաև հանրապետության մյուս մարզերի թղթակիցներից ստացված հաղորդումները: Հիմնական շեշտը դրվելու մարզային խնդիրների վրա, որն ըստ տնօրենի, պահանջելու է հետևողականություն և արդարացի լուծում:
Ընդլայնելով սահմանները ՄՆՆ կանդրադառնա նաև սփյուռքի հայ համայնքների գործունեությանը` սեփական թղթակցությամբ:
