«Տարոն ավիա» ընկերությունը դադարեցրել է իր աշխատանքները: Քաղավիացիայից ասում են, որ հայտնաբերվել են թերություններ, ժամանակ է տրվել դրանք շտկելու համար, իսկ ընկերության տնօրինությունը երկրում չէ, որպեսզի մեկնաբանի գործունեությունը դադարեցնելու որոշումը:
Հայկական ավիաընկերության փակումը ավիացիոն փորձագետ Դմիտրի Աթբաշյանը համարում է խելամիտ քայլ, քանի որ այն չի համապատասխանել ազգային փոխադրող ընկերության չափանիշերին: Իսկ ազգային փոխադրող ընկերություն Հայաստանը չունի, սակայն դրա անհրաժեշտությունը մեծ է:
Քաղաքավիացիայից այս դիտարկմանը չպատասխանեցին, քանի որ կոմիտեի ղեկավարը գործուղման էր:
«Տարոն-ավիա» ընկերության աշխատանքները դադարեցվել են: Եվրոպական ավիացիոն անվտանգության գործակալությունը երրորդ երկիր մուտք գործելու հետ կապված ընկերությունում կատարել է ստուգումներ և հայտնաբերել անհամապատասխանություն, «Ռադիոլուրին» փոխանցեց Քաղավիացիայի կոմիտեի թռիչքային պիտանիության վարչության պետ Կարեն Գյուրջյանը:
«Մենք այդ անհամապատասխանությունները ստուգելու նպատակով իրականացրել ենք մեր կողմից ստուգումներ և արդյունքում իրենց ժամանակ է տրվել, որ վերացնեն թերությունները, սակայն իրենք գերադասեցին դադարեցնել գործունեությունը, քանի որ ժամկետների մեջ չեն տեղավորվի»,- ասաց Գյուրջյանը :
Հայտնաբերված թերությունների պատճառով կասեցվել է ավիաընկերության օդանավ շահագործողի վկայականը: Մամուլում շրջանառվող այն տեսակետը, որ ընկերությունը խնդիրների առաջ է կանգնել իռլանդական «Ռայանէյր»-ի մուտքից հետո, կոմիտեի ներկայացուցիչը որակեց ապատեղեկատվություն:
«Իրականությանն ընդհանրապես չի համապատասխանում, որովհետև «Տարոն ավիա» ընկերությունը մինչև երրորդ երկրների սերտիֆիկատ ստանալը , իրենց օդանավերը հիմնականում շահագործվում էին Հյուսիսային Սուդանում: Եվ այդ երկու ընկերությունների գործառույթները որևիցե կապ չունեն միմյանց հետ»,- նշեց Քաղավիացիայի կոմիտեի թռիչքային պիտանիության վարչության պետը:
«Ռադիոլուրը» եղավ «Տարոն ավիայի» գրասենյակում՝ տեղում պարզելու խնդիրը: Նախ` բակում հավաքվածներն ասացին, որ ընկերությունն արդեն չի գործում, իսկ երբ մտանք շենք, տեղում էր միայն ընկերության հաշվապահը, որը չցանկացավ պատասխանել մեր հարցերին: Միայն փոխանցեց, որ ոչնչից տեղյակ չէ, իսկ ղեկավարությունը հանրապետությունում չէ: Հաջորդ շաբաթ կլինի Հայաստանում:
Ազգային ավիափոխադրող ընկերության լիազորությունների դադարեցումը փորձագետ, ավիատոր Դմիտրի Աթբաշյանը նորմալ է համարում: Հայաստանում գործող մի քանի ընկերություններ , ըստ նրա, ազգային փոխադրողի կոչմանը չեն համապատասխանում: Դրանց թվում է նաև «Տարոն ավիան»:
«Նորմալ ընկերությունը պետք է նորմալ կազմակերպի, որ ամեն մի թռիչքի սև արկղերը ուսումնասիրվեն, նայեն ինչ խախտումներ է եղել, ինչ պայմաններում է թռել, ինչ խախտումներ են եղել: Այս տեղեկությունները սև արկղերից պետք է հանվի ուսումնասիրվի, սակայն մեզ մոտ նման բան չի արվում: Մեր ընկերություններն իրավունք չունեն հայկական դրոշակի տակ թռնել, որովհետև ուսումնասիրություններն արվում են վերջին 20 ժամը 300 ժամվա մեջ: Դրա համար «Տարոն ավիայի թռիչքների դադարեցումը ճիշտ են արել, որ կասեցրել են»,- նշեց Աթբաշյանը:
Ազգային ավիափոխադրող ընկերություն հասկացությանը, փորձագետի դիտարկմամբ, մոտ էր միայն «Արմավիան», սակայն այս ընկերություն էլ է աշխատել առանց սև արկղերի ուսումնասիրությունների: Միայն 2006 թվականին տեղի ունեցած ավիավթարից հետո է ընկերությունն սկսել ուսումնասիրությունները։ Բայց այս ամենի վերահսկողությունը պետք է իրականացնի Քաղավիացիայի կոմիտեն, ասում է:
«Մենք չենք կարող ասել, որ այսօր ունենք ինքնաթիռների նորմալ վերահսկողություն ու մեր մոտ թռիչքների անվտանգությունն ուշադրության կենտրոնում է: Քաղավիացիան պետք է ունենա վերահսկողություն»,- հավելեց փորձագետը:
Ազգային փոխադրող ոչ մի ընկերություն Հայաստանը չունի, հայտարարում է փորձագետը: Քանի որ ազգային փոխադրող նշանակում է, որ ընկերության աշխատանքը պետք է վերահսկի կառավարությունը: Ու այդ ընկերությունը կարող է թռնել ոչ միայն այն ուղղություններով, որտեղից ունի մեծ շահույթ, այլ այն ուղղություններով, որոնք պետք են կառավարությանը:
«Նրանք երբեք առանց իրենց շահույթի չեն թռնի: Ազգային փոխադրողն անպայման պետք է իր գլխավոր մարմնի մեջ ունենա նաև կառավարության ներկայացուցչին: Օրինակ «Արմավիան» չուներ: Ամեն ինչ «Արմավիայում» որոշում էին երկու հոգի` Բաղդասարովն ու իր տնօրենը»,- ընդգծում է Աթբաշյանը:
Քաղավիացիայի կոմիտեի նախագահ Տաթևիկ Ռևազյանն իր հարցազրույցներից մեկում ասել էր, որ ցանկությունը մեծ է ունենալ ազգային ավիափոխադրող, տեղական փոխադրող, կայուն, հզոր ավիաընկերություն, որն ամբողջ աշխարհում գործի:
Սակայն որպես քաղավիացիայի կոմիտե իրենք չեն ստեղծելու այդ ընկերությունը: Իրենք հսկում են անվտանգությունը, և կոմիտեն իրավունք չունի ստեղծել ազգային փոխադրող: Նրա կարծիքով՝ Հայաստանին ավելի շատ անհրաժեշտ է տեղական ավիաընկերություն, որը կբազավորվի Հայաստանում, և արդյունքում կստեղծվեն աշխատատեղեր ոչ միայն օդաչուների, այլև ինժեներների համար:
