Աննա Մարտիկյան
«Ռադիոլուր»-Շիրակի մարզ
Օրերս ոստիկանությունը տեղեկություն էր տարածել, որ Շիրակի մարզի գյուղերից մեկում մի երիտասարդ աղջիկ 8 տարի շարունակ ենթարկվել է աշխատանքային շահագործման:
Նրան հունիսի 18 ին հաջողվել է փախչել եւ ապաստան գտել Ապարանի սարերում բնակվող հովիվների մոտ։
Աղջիկը ոստիկանության Արտաշատի բաժնի աշխատակիցներին պատմել է, որ այս տարիներին մի քանի անգամ փորձել է փախչել, բայց տղամարդը գտել է նրան, վերադարձրել գոմ, դաժան ծեծել և սպառնացել, որ հաջորդ անգամ այդպիսի փորձ անելու ժամանակ կխեղդի։
Փաստի առիթով հարուցվել է քրեական գործ, որը մեղադրական եզրակացությամբ ուղարկվել է Քննչական կոմիտե։
Շիրակի մարզի Մարմաշեն գյուղում իմանալով դեպքի մասին շատ են վրդովվել, համագյուղացի Ֆերմերին էլ են լավ ճանաչում, աղջկան էլ։
Գյուղի անասնաբույժը՝ Հարություն Խաչատրյանը նշում է, որ աղջիկը բարեխիղճ աշխատող է եղել, գործատուն էլ՝ Ռուբենը նրան նորմալ է վերաբերվե, աղջիկն էլ «մինչեւ անգամ իրա (Ռուբենի խմբ.) մորը մամա է ասել»։
Մարմաշեն գյուղի բնակիչներն ու վարչական ղեկավարը զարմացած են։ Ասում են՝ եթե աղջիկը գանգատ ունենար, գոնե մեկին տեղյակ կպահեր։ Հաճախ են տեսել, զրուցել նրա հետ։
«Առիթներ է եղել, հանդիպել եմ իրենց, ֆերմայում էլ, իրենց տանն էլ, էդ աղջկան իրենց տան անդամի պես էին վերաբերվում, իմ կարծիքով պետք է շնորհակալ լիներ»,- ասում է Մարմաշեն գյուղի վարչական ղեկավար Համլետ Տիգրանյանը։
Անհատույց կացարան, սնունդ ու ամիսը 40-50 000 դրամ աշխատավարձ են տվել՝ ասում է գործատուի մայրը՝ Սվետլանա Թորոսյանը։ Պատմում է՝ երբեմն տան բանալիներն է նրա մոտ թողել, վստահել է, ի վերջո 8-10 տարի միասին են ապրել։
Աղջիկը տիկին Սվետլանային պատմել է, որ մոր երկրորդ ամուսնու հետ չի ցանկացել ապրել նույն տանիքի տակ, փախել է Հայաստան։ «Դիմեցինք, որ մորը կանչեն տեսնի աղջկան, մայրը չեկավ, ինքն էլ լացեց»,- պատմում է։
Մինչ նախաքննական մարմինը կպարզի դեպքի մանրամասները ֆերմեր Ռուբեն Թորոյանն ասում է, որ «զրպարտության համար պատիվ է պահանջելու»։
