Հերթական բնապահպանական աղետն էր սպասվում Նոյեմբերյան համայնքում: Ռուսական «Պոլիմետալ» ընկերությունը պատրաստվում էր մետաղի որոնողական աշխատանքներ սկսել Կողբ և Նոյեմբերյան համայնքների տարածքներում: Բնակչության շրջանում դժգոհության մեծ ալիք էր բարձրացել՝ դեմ էին ցանկացած տեսակի հանքի շահագործմանը: Եվ երեկ իրենց մտահոգություններն են ներկայացրել Նոյեմբերյան այցելած ընկերության ներկայացուցիչներին:
Այսօր արդեն Նոյեմբերյանի քաղաքապետ Կարեն Աբազյանը «Ռադիոլուր»-ին փոխանցեց, որ ընկերությունը պատրաստակամություն է հայտնել հրաժարվել հանքարդյունաբերության նպատակով հետազոտական գործունեություն ծավալելուց:
«2 օր առաջ ես իրենց հայտնեցի, որ ժողովրդի դժգոհությունը բացասական է, իմը նույնպես: Եվ իրենք պատրաստակամություն հայտնեցին մինչև հանրային լսումները հանդիպել, զրուցել: Եվ երեկ եկան իրենց տնօրենն ու տեղակալը: Ես էլ տարբեր խավերից մարդիկ եմ հրավիրել: Եղավ ոչ պաշտոնական քննարկում, և իրենք համոզվեցին, որ բնակչությունը դեմ է իրենց ծրագրին: Այսօր առավոտյան զանգեցին և հայտնեցին, որ տեսնելով ժողովրդի ընդդիմությունը‘ պատրաստ են կասեցնել ծրագիրը»:
