Արմավիրի մարզում այս տարի ոռոգման շրջանն ավելի շուտ կբացվի: Համայնքներում արդեն սկսել են ոռոգման համակարգերի մաքրման աշխատանքները:
Գյուղատնտեսական նշանակության հողերի արդյունավետությունը բարձրացնելու նպատակով ոռոգման գերնորմատիվային ջրապահանջարկ ունեցող հողերում ըստ մշակաբույսերի սահմանված է նույն ջրի վարձը, բացի Ակնալճից և Արշալույս գյուղի մի հատվածից:
Այստեղ 1400 հեկտար ոռոգելի տարածքից մշակվում է ընդամենը 380 հա հող:
Գերնորմատիվային ջրապահանջարկ ունեցող հողերն Արմավիրի մարզում գտնվում են նախալեռնային գոտիներում: Դրանք շուրջ 20-ն են: Այդ համայնքներում հողերի մշակության համար նախատեսվածից ավելի շատ ոռոգման ջուր է տրվում: Կառավարությունը ընդառաջել է գերնորմատիվայի հողերի ունեցող գյուղացիներին և սահմանել ջրի վարձ 1 հա-ի հաշվարկով՝ հավելյալ ծախսերը վերցնելով իր վրա: Ջրային տնտեսության պետական կոմիտեի նախագահ Արսեն Հարությունյանը նշեց, որ 2017թ գերնորմատիվային հողերից հանվել է 801 մլն դրամ ջրի ծախս:
Արմավիրի մարզի Ակնալիճ համայնքի գերնորմատիվային հողերում ջրի վարձն ավելի թանկ է, քան մյուս նմանատիպ հողեր ունեցող համայնքներում: Համայնքի ղեկավար Գևորգ Միսակյանը դժգոհեց. «Եթե մյուս համայնքներում ցորենի համար ջրի վարձը վճարում են 55000 դրամ, ապա Ակնալճում վճարում են 77000 դրամ, 20 հազար դրամով ավելի»:
Խնդիրը տարիների պատմություն ունի, սակայն լուծում չի ստանում: Մոտ մեկ ամիս առաջ հարցը Արմավիրի մարզում տրվեց ջրային տնտեսության պետական կոմիտեի նախագահ Արսեն Հարությունյանին՝ խնդրելով վերանայել գյուղի գերնորմատիվային հողերի ջրի ծախսը և սահմանված գինը:
Ջրային տնտեսության կոմիտեի պատասխանատուները նշեցին, որ Ակնալճում ավելի շատ են ջուր ծախսում, քան սահմանված է գերնորմատիվային հողերի համար: Ոռոգման ջրի բարձր վճարի պատճառով Ակնալճում հողերի զգալի մասը չի մշակվում: Ավելի քան 1400 հա գյուղատնտեսական նշանակության հողերից 380 հա-ն է մշակվում: Ակնալճի հողերը հիմնականում Ուրց-Կոտայք-Շամիրամ գոտու 4-րդ և 5-րդ կարգի հողեր են, որոնք չմշակվելու պատճառով հետզհետե անապատացվում են:
Ջրային տնտեսության պետական կոմիտեի մասնագետներն առաջարկեցին փոխել մշակաբույսերի տեսակները և հիմնել բազմամյա տնկարքներ՝ պտուղ և խաղող, որոնք ավելի քիչ ջուր են պահանջում: Ակնաճում անցած 7 տարվա ընթացքում հիմնվել է 170 հա խաղողի այգի: Գյուղացիների մի մասը այլ համայնքների վարձակալած հողերն է մշակում, իսկ մյուսները, որոնք ավելի մեծ թիվ են կազմում, մարզի տարածքում օրավարձով են աշխատում:
«Իմ պայքարը նրանում է, որ մարդիկ մնան ու իրենց հողերը մշակեն, այտդեղից էլ կգոյանան հողի հարկերի գանձումը, էդ խնդիրը մենք էլ չենք ունենա», ասաց համայնքի ղեկավարը:
Ակնալճում նախատեսվել է կրկին չափագրումներ անել և որոշել ջրի ծախսը:
