Հանրության կողմից երկար սպասված ավտովարորդների վկայականների ճանաչման գործընթացը, կարծես, հանգուցալուծում ստացավ՝ անդրադառնալով Աստանայում տեղի ունեցած վարչապետերի վերջին հանդիպմանը՝ լրագրողների հետ զրույցում նկատել է Հայրենական ապրանք արտադրողների միության նախագահ Վազգեն Սաֆարյանը: Նա անդրադարձել է Աստանայում քննարկված մյուս թեմաներին ու խոսել մասնավորապես արդյունաբերության մասին: Սաֆարյանը համոզված է, որ մեքենաշինությունը հնարավոր է վերականգնել Հայաստանում:
Խորհրդային տարիներին «Երազ» գործարան ունեցող Հայաստանը արդեն 25 տարի է փորձում է վերականգնել արդյունաբերությունը՝ մասնավորապես մեքենաշինությունը: Այս առումով Հայրենական ապրանք արտադրողների միության նախագահ Վազգեն Սաֆարյանը Աստանայում տեղի ունեցած հանդիպումը բավականին հուսադրող է համարում: Հիմք ընդունելով Աստանայի վերջին հանդիպումն ու վերջերս Հայաստանում ԵԱՏՄ նախարարների հանդիպումները՝ Վազգեն Սաֆարյանը նշեց, որ ցանկանում են նոր ընթացք տալ ԵԱՏՄ շրջանակներում արդյունաբերության՝ մասնավորապես մեքենաշինության ոլորտի զարգացմանը: Ռուսաստանի մեքենաշինարարների միությունը, Բելառուսի ու Ղազախստանի համանման կառույցները ստեղծել են կոորդինացիոն խորհուրդ, որը գործում է ԵԱՏՄ շրջանակներում: Այս կառույցի հերթական նիստը սեպտեմբերին որոշվել է անցկացնել Հայաստանում:
Հանդիպմանն ընդառաջ Հայրենական ապրանք արտադրողների միությունը հաստոցաշինական ձեռնարկությունների ղեկավարներին դիմել է նամակով, որպեսզի տան իրենց առաջարկությունները, կոնֆերանսն ավելի արդյունավետ կազմակերպելու համար: Դիմել են նաև Կառավարությանը:
Մեքենաշինության արդյունաբերություն ասելով պետք է հասկանալ թե՛ հաստոցաշինություն, թե՛ ավտոմեքենաշինություն, պարզաբանում է Վազգեն Սաֆարյանը և ընդգծում. պետք է գնանք ոչ թե հումք վաճառելու, այլ պատրաստի արտադրանք արտահանելու ճանապարհով: Թե որքանով է այս ծրագիրը իրատեսական, հետաքրքրվեցինք նաև Տնտեսական զագացման և ներդրումների նախարարությունից: Այստեղից սակայն մեզ հայտնեցին, որ ծրագրերը շատ նախնական փուլում են և դեռևս ենթակա չեն հանրայնացման: Փոխարենը տնտեսագետ Վարդան Բոստանջյանը «Ռադիոլուր»-ի հետ զրույցում նկատեց, որ Հայաստանը մեքենաշինության բնագավառում բավականին լավ պոտենցիալ ուներ խորհրդային տարիներին: Շուկայական հարաբերությունների պայմաններում այդ պոտենցիալն աստիճանաբար կորցրեցինք, թե նյութական, թե կադրային առումով: Որքան էլ տնտեսագետը լավատեսորեն է տրամադրված, կարծում է, որ միայն հրաշքով կարող է վերակենդանանալ մեքենաշինությունը Հայաստանում:
Միայն հետևողական և համալիր աշխատանքների արդյունքում է հնարավոր իրատեսական ծրագրերի մասին խոսել, կարծում է Վարդան Բոստանջյանը՝ ընդգծելով, ոչ միայն ներդրումներ, այլև ժամանակ է հարկավոր հաջողությունների հասնելու համար:
