Երեկ երեկոյան Ակնալճի հայ-եզդիական բարեկամության հուշահամալիրում ծաղիկներ են խոնարհվել Շանգալի եղդիների ցեղասպանության զոհերի հիշատակին կանգնեցված հուշաքարին, իսկ ավելի ուշ սրբավայրում՝ Զիարատում, կազմակերպվել է մոմավառություն և հոգեհանգստի կարգ եզդի հոգևորականների կողմից:
«Շանգալում կազմնակերպված գործողություններ իրականացվեցին, նպատակը եղդիների ցեղասպանությունն էր: մի կողմից Իրաքի զորքն էր կանգնած, մյուս կողմից՝ քրդական: Երկուսն էլ միաժամանակ հետ քաշվեցին և խեղճ ժողովրդին թողեցին ոճրագործի ձեռքին»
Ցեղասպանության ընթացքում եզդիները գերեվարվել են: Մոտ 3500 կանայք, աղջիկներ և երեխաներ մինչև հիմա գտնվում են գերության մեջ, նրանց կարելի է հանդիպել իսլամական պետության տարբեր շուկաներում, որոնք որպես ստրուկ հանվել են վաճառքի՝ 5 դոլարից մինչև 1000 դոլար արժեքով: Մարդասիրական տարբեր ճանապարհներով 2014-ց մինչև հիմա եզդիները կարողացել են վերադարձնել 7500 գերիների: «Շամս» մարդասիրական հասարակական կազմակերպության նախագահ Ռուստամ Բաքոյանը դատապարտում է քաղաքակիրթ աշխարհին, որն անհաղորդ է եզդիների ստրկացմանը և իր տեսակետն է հայտնում:
«Սա տրագեդիա է 21-րդ դարում և անընդունելի քաղաքակիրթ մարդկության կողմից, թեև կարծում եմ, քաղաքակիրթ մարդկությունն է այս ամենը հրահրում, որովհետև մինչև հիմա էական որևէ միջոցառում չի ձեռնարկվել, որպեսզի եզդիների դեմ իրականացվող ցեղասպանությունը կանխվի»:
Զիարատում եզդիների ցեղասպանության հիշատակի օրը բացվել էր լուսանկարների ցուցահանդես: Նկարները պատմում էին եզդիների տեղահանման, սովալլուկ երեխաների, նրանց կատմամբ կիրառվող բռնությունների մասին: Սլոյան Դարվիշը հոգում ցավը պահած լուռ նայում էր նկարներին: Կանգնել էր Սինջարի նկարի մոտ ու փորձում հիշել տեղանքը, որտեղ եղել է դեռ 2003 թվականին: 
«Հազիվ ճանապարհը բացվել էր, գնացի մեր սրբավայրը՝ Լալեշը, եղա մյուս տեսարժան վայրերում, Սինջար լեռը շատ գեղեցիկ է»:
Հայ-եզդիական բարեկամության հուշահամալիրում ծաղիկներ խոնարհվեցին ցեղասպանության զոհերի, եզդի հերոսների, այդ թվում հայ-եզդի բարեկամության և եղբայրության հուշարձաններին, ավելի ուշ կազմակերպվեց մոմավառություն: Եզդիների հիշատակը հարգելու էին եկել նաև հայ բարեկամները: Արարատի մարզի Տափերական գյուղից 15-ամյա Գայանե Ղազարյանը միակ աշակերտուհին է, ով հաճախում է եզդերենի ուսուցման դասերին: Երեկ նա եզդիների սրբավայրում էր:
«Ինձ հետաքրքրում է պատմությունը: Շատ տպավորիչ է այն, երբ վերևից ինքնաթիռներով փորձել են պայթեցնել եկեղեցին, բայց չեն տեսել, քանի որ սրբավայր է, չի երևացել թշնամուն, ես եկել եմ հարգելու Շանգալի եզդիների զոհերի հիշատակը»:
Զիարատում ուշ երեկոյան եզդի հոգևորականները Շեյխ Տոսուն Ամոյան ու Ջնդի Ջնդոյանը աղոթք արեցին անմեղ զոհերի հշատակին: Եզդիների ցեղասպանության զոհերի հիշատակին Ակնալճի եզդիների սրբավայրում տեղադրվել է հուշաքար, որտեղ նախատեսվում է կառուցել հուշարձան:
