տեղադրված 13.01-ին
լրացված 15.54-ին
Երևանում անցկացվում է «Անտիկոնտրաֆակտ -2016» (Ընդդեմ կեղծ, անօրինական արտադրված ապրանքի) չորրորդ միջազգային համաժողովը: Նմանատիպ համաժողովներ անցկացվել են Ղազախստանում, ՌԴ-ում և Բելառուսում: ԵԱՏՄ անդամ երկրների պետական ու մասնավոր հատվածի ներկայացուցիչները երկու օր փորձելու են հասկանալ, թե ինչպես են պայքարելու կեղծ արտադրված ապրանքների դեմ: Տնտեսական զարգացման ու ներդրումների նախարարի առաջին տեղակալ Գարեգին Մելքոնյանը կարծում է, որ Հայաստանն անելիքներ ունի: Համաժողովին մասնակցել է նաև փոխվարչապետ, միջազգային տնտեսական ինտեգրման ու բարեփոխումների նախարար Վաչե Գաբրիելյանը: Փոխվարչապետը կարևորել է համաժողովի անցկացումը: ՀՀ տնտեսական զարգացման ու ներդրումների և ՌԴ արդյունաբերության ու առևտրի նախարարությունները արդյունաբերական ապրանքների ապօրինի շրջանառության հակազդեցությանը նվիրված համատեղ հայտարարություն են ստորագրել:
Ինչպես կանխել ԵԱՏՄ երկրների տարածք կեղծ ապրանքների ներմուծումը. անդամ երկրները երկու օր Երևանում այս հարցն են քննարկելու՝ «Ընդդեմ կեղծ, անօրինական արտադրված ապրանքի« կամ «Անտիկոնտրաֆակտ -2016» չորրորդ միջազգային համաժողովի շրջանակներում:
Տնտեսական զարգացման ու ներդրումների նախարարի առաջին տեղակալ Գարեգին Մելքոնյանն ընդգծում է՝ շատ ապրանքներ ներթափանցում են շուկաներ կեղծ արտադրված այլ ապրանքային նշանների ներքո։ Այստեղ է, որ կարևորվում է պետական տարբեր կառույցների միջև համագործակցությունը: Վիճակագրություն չկա, սակայն, Մելքոնյանի խոսքով, Հայաստանը վատ դիրքերում չի : «Եթե ռուսական օղիները Հայաստանում կեղծվում են եւ այդ օղու ապրանքային նշանը ՀՀ-ում նույնպես գրանցված եւ պաշտպանված է, ապա ապրանքային նշանի սեփականատերը իրավասու է դիմել պետական պատկան մարմիններին՝ տվյալ դեպքում ոստիկանությանը, պահանջելով, որ շուկայից խմբաքանակը հանվի: Մի տառի, մի դիզայնի փոփոխությունը համարվում է շփոթության աստիճանի նմանություն եւ ենթակա չէ գրանցման: Եթե չի գրանցվել, հետեւաբար պաշտպանված չէ՝ ասում է տնտեսական զարգացման ու ներդրումների փոխնախարար Գարեգին Մելքոնյանն ու տեղեկացնում ՝ յուրաքանչյուր երկիր ունի ապրանքի գրանցման իր համակարգը։
Ռուսաստանի Դաշնության արդյունաբերության եւ առեւտրի փոխնախարար Վիկտոր Եվտուխովն էլ է խոստովանում՝ խնդիրները շատ են, դրանց մի մասը մտավոր սեփականության իրավունքի խախտումներն են:
ԵԱՏՀ կոլեգիայի անդամ, տնտեսական ու քաղաքական հարցերի նախարար Թիմուր Սուլեյմենովը խոստովանում է՝ պարադոքս է, բայց կանխատեսումների համաձայն, առեւտրի ծավալները նվազում են, կեղծ ապրանքերի առեւտուրը՝ աճում։
«Այդպես, եթե 2014-ին այն կազմել է 250 մլրդ դոլար, ապա 2015-ին 461 մլրդ, ինչը համաշխարհային ընդհանուր առեւտրի շուրջ 3 տոկոսն է: Պատկերացնում եք 461 մլրդ դոլարը եվրոպական երկրների համախառն ներքին արդյունքն է: Իսկ դա կեղծ ապրանք է, որը հարկեր չի վճարում, կասկածելի որակ ունի»:
ՌԴ արդյունաբերության և առևտրի նախարար Դենիս Մանտուրովն էլ իր ելույթում ասաց, որ ապրանքների ապօրինի շրջանառությունը լուրջ հարված է հասցնում երկրների տնտեսություններին: Նրա խոսքերով՝ ապօրինի շրջանառությունը ՌԴ տնտեսությունում կազմում է 5-30 տոկոս, ինչը մեծ վնաս է տնտեսության համար: Ուստի, ըստ Դենիս Մանտուրովի, ԵԱՏՄ տարածքում երկրների հարաբերությունների արդյունքում ապրանքների ապօրինի շրջանառության դեմ պայքարի հստակ քաղաքականության կա:
Այս օրերին համաժողովի մասնակիցները կփորձեն հասկանալ, թե ինչպես են համագործակցելու գործընկեր երկրների հետ: Դեղեր, հագուստ, կոշկեղեն, սննդամթերք, կոսմետիկ միջոցներ ու շինանյութ. ռիսկային խմբում այս ապրանքներն են: Համաժողովի մասնակիցները կարծում են, որ ոլորտը կարգավորելու լավագույն տարբերակը գրագետ տեղեկատվական քաղաքականության ձևավորումն է: Բաղի այդ, ջանքեր են ներդրվում ԵԱՏՄ տարածքում միասնական պահանջներ ներդնելու ուղղությամբ:
