Մշակույթ

Գրադարանները արագընթաց փոփոխությունների շրջանում են. մշակույթի նախարարությունում մեծարեցին գրադարանավարներին

alisagevorgyan

Գրադարանավարի օրվա առիթով Հայաստանի և ԼՂՀ գրադարաններում իրականացվող  «Դարձի՛ր գրադարանի բարեկամ» ծրագրի շրջանակներում այսօր նախատեսված էր միջոցառումների հարուստ ցանկ՝ նվիրված նաև ՀՀ անկախության 25-ամյակին: Միջոցառումներին մասնակցել են ՀՀ  շուրջ 200, ինչպես նաև Արցախի ութ գրադարաններ:  Ծրագրի շրջանակներում անցկացվել են վերջին 25 տարիներին հրատարակված գրքերի ցուցադրություններ, հանդիպումներ գրական հետաքրքիր դեմքերի հետ: Ամփոփվել են  նաև սեպտեմբերի 1-ին մեկնարկած ՝ համայնքային և զորամասերի  գրադարանների գրքային հավաքածուների համալրման նպատակով իրականացվող  նվիրատվության արդյունքները:  Առանցքային միջոցառումը տեղի է ունեցել ՀՀ մշակույթի նախարարությունում, որտեղ պատվել ու շնորհավորել են օրվա հերոսներին:

 

gradaranavarՊատվոգրեր, շնորհակալագրեր, տոնական տրամադրությունն ամբողջացնող ծաղկեփնջեր. մշակույթի նախարարության հարգարժան հյուրերն այսօր գրադարանավարներն էին, ում համար  2004-ին ընդունված կառավարության որոշումից հետո հոկտեմբերի 7-ը նշանավորվում է որպես մասնագիտական տոն: Տոնական շնորհավորանքներից զատ մշակույթի փոխնախարար Ներսես Տեր- Վարդանյանն այսօր ներկայացրեց ոլորտում տիրող իրավիճակը՝ նկատելով, որ հանրապետության ավելի քան 900 գրադարաններից 13-ը գործում են  մշակույթի նախարարության, մյուսները՝ համայնքների  ենթակայության ներքո, ուստի վերջինների ակտիվությամբ է հիմնականում պայմանավորված այս կամ այն համայնքում գործող գրադարանի վիճակը։

«Մեզ համար մտահոգիչ է համայնքային գրադարանների վիճակը: Ցավոք՝ քիչ չեն գրադարանների փակման դեպքերը: Այժմ մարզպետարանների հետ միասին մենք իրականացնում ենք ուսումնասիրություններ համայնքային գրադարանների իրական վիճակը պարզելու համար: Հիմնական նպատակն է ՝ ձևավորել  սկզբունքներ, որոնք համայնքում ապրող յուրաքանչյուր ընթերցողի ևս գրադարանից  օգտվելու հնարավորություն կտան»։

Գրադարանին ներկայացվող պահանջները ժամանակի ընթացքում փոխվում են: Ըստ Ներսես Տեր-Վարդանյանի, այսօր առանձնահատուկ ուշադրության կենտրոնում է  գրադարանների թվայնացումը։ Փորձում են վերանայել գրադարանային ֆոնդերի, մասնավորապես հայկական թեմային առնչվող աշխարհում հրատարակվող գրականության ձեռքբերումը: Հատուկ ուշադրություն է դարձվում գրադարաններում այլ ծառայությունների ակտիվացմանը, կարևորվում է գրադարան-գրախանութ համագործակցությունը: «Գիտեք արդեն  նախարարի մոտեցումը՝ գրադարանները միաժամանակ  որպես ժամանցի կենտրոն դիտարկելու, դրանք  ընտանեկան հանգստի համար անհրաժեշտ բաղադրիչներով հարստացնելու վերաբերյալ: Այդ ուղղությամբ լուրջ քննարկումներ են ընթանում և՛ հրատարակիչների, և՛ գրախանութների հետ»:

Փոխնախարարի բնորոշմամբ՝ գրադարաններն այս պահին արագընթաց փոփոխությունների շրջանում են: Արդյունքներն առավել շոշափելի կլինեն առաջիկայում:

Back to top button