Այսօր` մեծանուն կոմպոզիտոր Արամ Խաչատուրյանի ծննդյան օրն է: Ավանդույթի համաձայն այս օրը նշանավորվում է նաև Արամ Խաչատրյանի անվան միջազգային մրցույթի մեկնարկով: Հանրապետության նախագահի տիկին Ռիտա Սարգսյանի բարձր հովանավորությամբ, ՀՀ մշակույթի նախարարության, «Արամ Խաչատրյան մրցույթ» մշակութային հիմնադրամի և Երևանի Կոմիտասի անվան պետական կոնսերվատորիայի նախաձեռնությամբ իրականացվող մրցույթի բացման հանդիսավոր արարողությունը տեղի կունենա այսօր ՝ Արամ Խաչատրյան համերգասրահում: Ծրագրում կոմպոզիտորի լավագույն ստեղծագործություններն են։
Արամ Խաչատրյանի անվան միջազգային 12-րդ մրցույթն այս տարի ուղղված կլինի տաղանդավոր դիրիժորների բացահայտմանը: «Դիրիժորական մրցույթներ աշխարհում հազվադեպ են կազմակերպվում: Կասկածում էին՝ կստացվի, չի ստացվի, բայց զարմանալի բան տեղի ունեցավ»,-ասում է Արամ Խաչատրյանի անվան միջազգային մրցույթի հոգաբարձուների խորհրդի անդամ Արմեն Սմբատյանը: Նրա տեղեցկացմամբ` մրցույթին մասնակցելու համար մոտ երեսուն երկրներից հայտ են ներկայացրել 57 երիտասարդ դիրիժորներ: Նրանցից մրցույթին կմասնակցեն 12-ը:
Հայաստանը ներկայացնող մասնակից մրցույթում այս տարի ընդգրկված չէ, բայց ունենք հայրենակիցներ Ռուսաստանից և Լիբանանից: Ավելին ՝ լիբանանահայ Ռաֆի Միքայելյանը երաժշտական իր բուն կրթությունն ու մկրտությունը ստացել է Երևանի Կոմիտասի անվան պետական կոնսերվատորիայում:
Արամ Խաչատրյանի անվան միջազգային ժյուրին այս տարի կղեկավարի անվանի դիրիժոր Յուրի Դավթյանը: Ժյուրի կազմում են նաև Ալ. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը, դաշնակահար, դիրիժոր Վահագն Պապյանը, «Ասկոնաս Հոլթ»-ի գործադիր տնօրեն Մարկ Հիլդրյուն, Լոնդոնի ֆիլհարմոնիկ նվագախմբի տնօրեն Դեյվիդ Ուելթոնը, հույն կոմպոզիտոր և դիրիժոր Միխալիս Իկոնոմուն: Արամ Խաչատրյան միջազգային մրցույթի տնօրեն Աննա Տեր-Հովակիմյանի վստահեցմամբ հունիսի 6-ից 14-ը արվեստասերներին երաժշտական իրական տոնախմբություն է սպասվում:
Պարգևատրման արարողությամբ և գալա-համերգով Արամ Խաչատրյան համերգասրահում հունիսի 14-ին կամփոփվեն խաչատրյանական միջազգային 12-րդ մրցույթի արդյունքները: Առաջին մրցանակակիրը կստանա 10 հազար ԱՄՆ դոլարին համարժեք դրամ դափնեկրի դիպլոմ, ինչպես նաև երկու համերգների հնարավորություն:
