Քաղաքական-հասարակական շրջանակներում շարունակում են գնահատել Հովիկ Աբրահամյանի երեկվա հայտարարության հիմնական թեզերը: Վարչապետը մի շարք առանցքային հարցադրումներ է հնչեցրել՝ խոսելով կոռուպցիայի, մենաշնորհների դեմ պայաքարի և այդ պայքարն ավելի տեսանելի, իսկ պետական կառավարման համակարգն առավել քիչ ծախսատար ու կոմպակտ դարձնելու մասին: Ընդդիմադիր ու իշխանական կուսակցությունները վարչապետի հայտարարությունները տարբեր կերպ են ընկալել. առաջին թևում տարակուսում են, հարցեր առաջադրում, երկրորդում նշում են, որ վարչապետի նշած խնդիրները չիրագործվելու այլընտրանք չունեն:
ՀՅԴ խմբակցության քարտուղար Աղվան Վարդանյանը համաձայն չէ գնահատականին, թե վարչապետի ելույթը կառավարության ձախողման մասին խոստովանություն է: Դաշնակցությունն իր գնահատականը հնչած թեզերին տալիս է՝ ելնելով իրավիճակից: Աղվան Վարդանյանն ասում է՝ Հովիկ Աբրահամյանի ելույթն առկա խնդիրների ու նպատակադրումների փաստաթղթավորում է: «Այո, պետք է մեր կառավարումը դառնա առավել արդյունավետ ու օպտիմալ, պետք է առավել հասցեական դառնա պատասխանատվությունը: Ով չի կարողանա, չի անի… բնական է, որ հասարակությունը պետք է պահանջատեր լինի այն ուժերից, ովքեր պատասխանատու են իշխանության գործունեության համար»:
Իշխանության գործունեության համար պատասխանատու ուժերի մեջ Հանրապետականի հետ նաև Դաշնակցությունն է: Բոլորվին վերջերս , Վարդանյանի փոխանցմամբ, տեղի է ունեցել ՀՅԴ-ՀՀԿ համակարգող խորհրդի առաջին նիստը, որում նույնպես այդ թեմաները քննարկվել են: Վարչապետի նշած թեզերը նաև Դաշնակցության կարևորած խնդիրներն են , ուստի փորձելու են հստակ ժամանակացույցով, հետևրողականորեն առաջ գնալ:
Աղվան Վարդանյանը հավատում է, որ շոշափելի արդյունքեր են լինելու: «Արդյունքներ կլինեն, չլինեն, իրավունք կունենաք ասելու, որ հերթական անգամ խոսքը գործի չվերածվեց»:
Ի տարբերություն Դաշնակցության՝ կառավարության մտադրությունների անկեղծությանն այդքան էլ չի հավատում ընդդիմադիր «Ժառանգությունը»: «Վարչապետի ելույթի երևի թե ամենաանկեղծ մասը «հարգելի գործընկերներ» արտահայտությունն էր»,- ասում է կուսակցության փոխնախագահ Արմեն Մարտիրոսյանը։ Ըստ նրա՝ վարչապետը նշել է բոլոր այն խնդիրները, որոնց առկայության համար ուղիղ պատասխանատվություն է կրում: Չհաղթահարվող կոռուպցիան կամ մենշանորհները նոր երևույթ չեն, կամ մեր պետական համակարգում առկա են այնքան ժամանակ, որքան այդ համակարգում դերակատարում ունի նաև վարչապետը: Այնպես որ, ընդդիմադիր գործիչը նաև հոռետես է, կարծում է ՝չի հաջողվելու կյանքի կոչել այն, ինչի մասին խոսում էր վարչապետը: «Ազատ , մրցակցային տնտեսություն, ազատ քաղաքական դաշտ, սոցիալական արդարություն, արդյունավետ կառավարություն ունենալու համար երկու սկզբունք է պետք՝ արդարություն և հավասրաությունը: Ոչ արդարություն կա, ոչ էլ հավասարություն»,- ասում է։
Մարտիորսյանը լավատես չէ նաև այն հարցում, թե կոնկրետ ինչ քայլեր կհաջորդեն վարչապետի ելույթին: Կարծում է՝ գլոբալ խնդիրները կմնան, փոքր փոփոխություններ կլինեն: «Մի քանի սլաքավար դասախոս կամ բժիշկ կգտնեն, կասեն պայքարում ենք կոռւոպցիայի դեմ»:
Կոռուպցիան հաղթահարելու ուղղությամբ լրջագույն քայլեր արվել են, բայց դրանք բավարար չեն՝ սա է ասել վարչապետը՝ ըստ Հանարապետական կուսակցության ներկայացուցչի: Կառավարության աշխատակազմի ղեկավար-նախարար Դավիթ Հարությունյանն ասում է, որ անգամ 2016-ի սկզբից կառավարության ընդունած որոշումները վերլուծելու դեպքում կարելի է համոզվել, որ քայլեր արվել են:
Հովիկ Աբրահամյանը, ըստ Հարությունյանի, առաջարկում է մեղմ քայլերից անցնել կտրուկ քայլերի: «Այն, ինչ ասել է վարչապետը, հետևյալն է՝ դա բավարար չէ, պետք են նաև այնպիսի քայլեր, որոնք թույլ են տալիս միանգամից տեսնել շոշափելի արդյունք, որովհետև ընդհանուր իրավիճակի բարելավումը տարեցտարի, ամսեամիս ճիշտ ուղղություն է, այդ ուղղությունը պետք է շարունակել, բայց նաև անհրաժեշտ են արմատական քայլեր»:
Ըստ Հարությունյանի՝ կոռուպցիայի դեմ պայքարը ոչ այնքան նյութական միջոցներ, որքան քաղաքական կամք , իսկ որոշ դեպքերում ՝ ծայրահեղ կոշտ որոշումներ են պահանջում:
Նախարարը տպավորություն ունի, որ այդ որոշումներն իր համար վարևչապետն արդեն մշակել է: «Վարչապետն ասաց, որ ինքն արդեն իր համար արդեն պատրաստել է որոշակի մոտեցումներ, սպասում է նաև հանրային արձագանքին, ակտիվ քաղաքացիների, քաղաքական ուժերի արձագանքին, որպեսզի իր փաթեթն ամբողջացնի և կյանքի կոչի»:
Կառավարությունն ունի բավարար քաղաքական կամք կյանքի կոչելու բոլոր անհրաժեշտ քայլերը՝ վստահեցրել էր վարչապետը, նաև տեղեկացրել, որ հանրային պարբերական քննարկումների շարք է սկսվում: Կառավարությունը լսելու է քաղաքական ուժերի, քաղհասարակության ու պարզապես մտոհոգ մարդկանց առաջարկությունները: Քննարկումները մեկնարեկլու են վաղվանից:
