տեղադրվել է ժամը 13։11- ին
լրացվել է ժամը 18։08- ին
Խորհրդարանում այսօր քառօրյայի երկրորդ օրվա աշխատանքը սկսել են Երևանում ավտոբուսի պայթյունի և սահմանային իրավիճակի անդրադարձով: ԱԺ փոխնախագահը ցավակցել է զոհվածների հարազատներին, վիրավորներին շուտափույթ ապաքինում է մաղթել, իսկ պատգամավորները մտահոգություններ են հայտնել պաշտոնական կառույցների տրամադրած տեղեկատվության օպերատիվության ու վստահելիության մասին: Իրավիճակի գնահատականներից ու պարզաբանումներից հետո պատգամավորներն անցել են օրենսդրական աշխատանքին՝ շարունակելով Ընտրական օրենսգրքի նախագծի՝ երեկ սկսված քննարկումը: Բայց մինչ այդ` անակնկալ շրջադարձ է արձանագրվել այսօր նախատեսված միակ քվեարկության ժամանակ:
Խորհրդարանն այսօր քվեարկությամբ մերժեց «Հրազդան ցեմենտ» գործարանին հարկային արտոնություններ տրամադրող օրինագիծը: Նախագիծն, ի դեպ, երկու ընթերցումներով ընդունվել էր նախորդ քառօրյաների ընթացքում, այսօր քվեարկվում էր երրորդ ընթերցմամբ և ամբողջությամբ: Սա, ի դեպ, օրենսդրական առաջին լուրջ նախաձեռնությունն էր, որը խորհրդարանի դատին ներկայացնում էր էկոնոմիկայի նորանշանակ նախարար Արծվիկ Մինասյանը: Օրինագծին կողմ էր քվեարկել 53- ը, ձեռնպահ 1- ը։ Այսինքն՝ չէր ընդունվել՝ անհրաժեշտ քվորումի բացակայության պատճառով։ Ընդդիմադիրներինն էին, որոնք քվեարկությանը չմասնակցեցին: ԲՀԿ-ն, ՀԱԿ-ը, ՕԵԿ-ն ու Ժառանգությունը դեմ էին օրինագծին:
Նախագիծը, հիշեցնենք, նախատեսում էր «Հրազդան-Ցեմենտ» ընկերությանը ազատել մինչև 2016թ. փետրվարի 1-ը հաշվարկված, բայց չվճարված հարկային և պարտադիր սոցիալական ապահովագրության գծով առաջացած տույժերից` 510 մլն 125 հազար դրամ ընդհանուր գումարի չափով: Ըստ կառավարության՝ համաշխարհային ֆինանսատնտեսական ճգնաժամի տարիներին հանրապետությունում շինարարության տեմպերի կտրուկ անկման հետևանքով ընկերության աշխատանքն ընթացել է անկայուն ռիթմով, հաճախակի ընդհատումներով, ինչը բացասական ազդեցություն է ունեցել ընկերության ֆինանսատնտեսական գործունեության վրա` արդյունքում առաջացնելով ֆինանսական պարտավորություններ:
Ի դեպ, պարտքը, ըստ կառավարության, կուտակվել է նաև ոչ բավարար մենեջմենթի պատճառով: 2016թ. փետրվարի 1-ի դրությամբ ընկերության ընդհանուր պարտքը կազմել է 933 մլն դրամից ավելի: Արդյուքնում ՝ «Հրազդան-Ցեմենտ»-ի ողջ գույքը և բաժնեմասերը վարկի դիմաց գրավադրվել են «ՎՏԲ-Հայաստան Բանկ»-ում, դրանց սեփականության իրավունքը անցել է բանկին:
Բաժնետոմսերի ճակատագիրը որոշող քվեարկությունից առաջ Հրանտ Բագրատյանը հայտարարեց, որ տույժերը պետք է վճարի գործարանի նախկին սեփականատեր Միխայիլ Բաղդասարովը, Նաիրա Զոհրաբյանը նախկին սեփականատիրոջը ՙպեղել- գտնելու՚ կոչ արեց, Հեղինե Բիշարյանն էլ առաջարկեց՝ եթե խոշոր ընկերության պարտքերը ներվում են, ապա քաղաքացիներինն էլ պետք է ներվեն: «Սա մեր զինվորների և մեր պաշտպանության գումարներն են, դեմ քվեարկեք»:
Խորհրդարանի ընդդիմադիր խմբակցությունները քվեարկությանը չմասնակցեցին , քվորում չապահովվեց, ինչի արդյունքում նախագիծը չընդունվեց: Ի դեպ, միակ դեմ քվերակողը ՀՀԿ-ական պատգամավոր Կարեն Կարապետյանն էր:
Հաջորդն օրակագում Ընտրական օրենսգրքի նախագիծն էր: Դրա քննարկումը սկսվել էր երեկ, ընթացավ այսօր, կշարունակվի նաև վաղը: Հիմնական զեկուցող կառավարության ներկայացուցիչ Դավիթ Հարությունյանը պատասխանել էր մի քանի տասնյակ տարատեսական հարցերի՝ տեխնիկականից մինչև բովանդակային ու քաղաքական: Ի դեպ, քաղաքական հարցադրումներից հիմնականը կայուն մեծամասնությանը վերաբերող դրույթն է: Հրանտ Բագրատյանը կարծում է, որ ավելի դեմոկրատական կլիներ կայուն փոքարմասնություն մասին դրույթ ունենալը: Բայց նրա հիմնական հարցն այլ էր՝ նախագիծը մի կողմից կայուն մեծամասնության դրույթն է ամրագրում, մյուս կողմից բարձարցնում է օրգանական օրենքների ընդունման համար անհրաժեշտ ձայների շեմը, ինչը ընդդիմության լիազորությունների մեծացման համատեքստում է ներկայացվում, բայց Բագրատյանի հաշվարկներն այլ բանի մասին են խոսում:
Ընտրական օրենսգրքի քննարկումը շարունակվելու է նաև վաղը՝ պատգամավորների ու խմբակցությունների ելույթներով:
