ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանը համախմբան կոչ է անում: Նա առաջարկում է սևերի կամ սպիտակների չբաժանվել, ավելի պարզ՝ չտարանջատել իշխանությունն ու ընդդիմությունը: «Գոյության խնդիր է, ասում է ու պարզաբանում՝ թշնամին ոչնչացնում է բոլոր հայերին՝ առանց հաշվի առնելու նրանց կուսակցական պատկանելությունը»: Վարդան Այվազյանն ու տնտեսագետ Վարդան Բոստանջյանն այսօր բանավեճել են ներկա իրավիճակի շուրջ։
ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանը պատրաստ է հրաժարվել իր 35 հազար դոլար արժողությամբ ծառայողական մեքենայից ու ոտքով խորհրդարան հասնել: Համենայն դեպս, պատգամավորն այսօր այդպես հայտարարեց, իսկ հրաժարման պատճառը՝ ֆինանսական միջոցների խնայողությունն ու գումարները սպառազինությանն ուղղելն է։ «Ինձ որ մնա, եկեք լրիվ մեքենաները հանենք: Ի՞նչ է եղել որ: Եթե դու խոսում ես ամեն ինչը ռազմաճակատի համար, ես գտնում եմ, որ ընդհանրապես պետք չի, որ մեքենա լինի: Թող պետությունը որոշի առաջին տասը հոգուն, մյուսները չլինեն, ես դրան էլ եմ համաձայն»:
Նախկին պատգամավոր Վարդան Բոստանջյանը, որը նույնպես օգտվել է 35 հազար դոլար արժողութաբ ծառայողական մեքենաներից, այսօր իր հաշվարկներ է ներկայացնում։ «Մի սպասարկող մեքենայով կարող ես երկու հատ թռչող անօդաչու սարք առնել: Բյուջեի հաշվին ով չի ալարում մեքենա ունի: Էս ի՞նչ մոտեցում է: Առավել ևս, որ ճնշող մեծամասնությունը երեխա ժամանակ երազել է «սամոկատ» ունենալ:
«Ցանկացած երկիր իր մարտավարությունն ունի»,- ասում է ԱԺ տնտեսական հարցերի մշտական հանձնաժողովի նախագահ Վարդան Այվազյանն ու առաջարկում՝ ոչ թե անօդաչու թռչող սարք ստեղծել, այլ՝ պատրաստել դրանց ոչնչացնողին: ՏՏ ներկայացուցիչներն այս օրերին հայտարարում են՝ պատրաստ են, ավելին՝ առաջարկել են Հայաստանի համար անօդաչու սարքեր ստեղծել
«Մեկն էլ առաջարկում է ատոմային բոմբ ստեղծել, եկեք միջուկային ստեղծենք, թռչող ափսեն էլ վրադիր: ՏՏ կոնկրետ իրականացնու՞մ է այդ հարցը: Էն մեկն ասում է հավերժական շարժիչ եմ ստեղծել, մեկը մոտս գալիս էր տարիուկես, ասում էր մի շարժիչ եմ ստեղծել, որի համար ոչ նավթ է պետք, ոչ մի բան»,- արձագանքում է Վարդան Այվազյանը։
ՀՀԿ- ական պատգամավորը կարծում է, որ մասնագետները կարող էին մեկ օրինակ ստեղծել, ցուցադրել, հետո ֆինանսավորում ստանալ: ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանն առաջարկում է սևերի կամ սպիտակների, ավելի պարզ՝ իշխանության կամ ընդդիության չբաժանվել: Այս փուլում ՀՀԿ պատգամավորը ուժերի համախմբան կոչ է անում, ավելին՝ նկատում է՝ բոլոր մեղավորները պետք է պատասխանատվության ենթարկվեն՝ եթե մեղավոր է՝ իրենից սկսած:
Վարդան Այվազյանի խոսքով, Ադրբեջանի բլից կրիգի քաղաքականությունն իրականում տապալվեց։
Թե ՀՀԿ-ական պատգամավոր Վարդան Այվազյանը, թե ԲՀԿ- ական նախկին պատգամավոր, տնտեսագետ Վարդան Բոստանջյանը համակարծիք են՝ որ ԵԱՏՄ-ից դուրս գալը Հայաստանի համար ձեռնտու չէ: ԱԺ տնտեսական հարցերի մշտական հանձնաժողովի նախագահ Վարդան Այվազյանը վստահ է՝ Հայաստանը պետք է մասնակցի Մոսկվայում կայանալիք Եվրասիական միջկառավարական հանձնաժողովի նիստին ու բարձրաձայնի մտահոգող հարցերը:
