Մշակույթի նախարարության աջակցությամբ Ստանիսլավսկու անվան ռուսական պետական դրամատիկական թատրոնում երեկ տեղի է ունեցել հոբելյանական երեկո` նվիրված արձակագիր Լևոն Խեչոյանի ծննդյան 60-ամյակին: Երեկոյի բեմադրիչն էր Հայաստանի ժողովրդական արտիստ Վահե Շահվերդյանը: Միջոցառմանը մասնակցել է Մշակույթի նախարար Հասմիկ Պողոսյանը:
«Գրողը ճանապարհ է դուրս գալիս առավոտ կանուխ, բոլորից առաջ, երբ աքաղաղն անգամ առաջին կանչն արած չի լինում, բայց երբեք որևէ տեղ չի հասնում, նրա կարևորությունը միշտ գնալու մեջ է». Լևոն Խեչոյան:
Գրողի 60-ամյակին նվիրված հոբելյանական երեկոյի ընթացքում Հ. Աբելյանի անվան պետական դրամատիկական թատրոնի դերասանախումբը ներկայացրեց արձակագրի «Դատախազի թաղումը» և «Կարմիր կոշիկները» պատմվածքների հիման վրա բեմադրված ներկայացումների առաջնախաղերը:
«Խեչոյանի արձակը հեշտ չէ դրամատուրգիայի վերածել, այն շատ հարազատ է իմ ձեռագրին: Երկու տարի առաջ ես հասկացա, որ Խեչոյանը իմ գրողն է»,-ասում է երեկոյի բեմադրիչ, ՀՀ ժողովրդական արտիստ Վահե Շահվերդյանը:
Խեչոյանի կյանքի տարբեր ժամանակաշրջանները ներկայացնող գրական-գեղարվեստական կոմպոզիցիա՝ դերասանների, ասմունքողների և երաժիշտ կատարողների մասնակցությամբ: Մհերի դռան գրքից մի հատված հանդիսատեսին ներկայացրեց ՀՀ վաստակավոր արտիստ Գրետա Մեջլումյանը, Լևոն Խեչոյանը նրան համարում էր մեր ժամանակների լավագյուն դերասանուհիներից մեկը:
Հոբելայանական երեկոն բացահայտում էր ոչ միայն Լևոն Խեչոյան գրողին, այլև ազատամարտիկին՝ գրողի արցախյան պատերազմի մասին հուշագրերի ներկայացմամբ: Արձակագիր, զինվոր ու քաղաքացի Լեւոն Խեչոյանի առաջին գիրքը` «Խնկի ծառերը», լույս է տեսել 1991 թվականին: Նրա վերջին` «Մհերի դռան գիրքը» վեպի ազդօրինակը լույս տեսավ գրողի մահվանից տառացիորեն մեկ շաբաթ առաջ:
