ԱՄՆ զինված ուժերը հայտարարել են, որ Իրանի դեմ նոր հարվածներ են հասցրել՝ Հորմուզի նեղուցում նավերին թիրախավորելու Իրանի կարողությունները «սահմանափակելու» համար։
Հարվածների 10-րդ գիշերը հաջորդել է ամերիկացի զինվորների մահվան համար Իրանին պատժելու ԱՄՆ նախագահ Դոնալդ Թրամփի խոստմանը, գրում է BBC-ին։
Իրանը, իր հերթին, հայտարարել է, որ հարվածներ է հասցրել Հորմուզի նեղուցում գտնվող երկու նավթատար նավերի, ինչպես նաև Բահրեյնում, Քուվեյթում և Հորդանանում տեղակայված ամերիկյան ռազմական օբյեկտներին, հաղորդում է IRNA պետական լրատվական գործակալությունը։
Իրանի նախագահ Մասուդ Փեզեշքիանը հայտարարել է, որ երկիրը գտնվում է ԱՄՆ-ի հետ «լիամասշտաբ պատերազմի» պայմաններում։
Ավելի վաղ Թրամփը հայտարարել էր, որ նախորդ գիշեր Իրանը «շատ ուժեղ» հարված է ստացել՝ «ի պատիվ» վերջերս զոհված երեք ամերիկացի զինվորների։
ԱՄՆ կենտրոնական հրամանատարությունը հայտարարել է, որ իր վերջին հարվածները թիրախավորել են Իրանի «ռազմական հրամանատարական կենտրոններ, հրթիռների և անօդաչու թռչող սարքերի արձակման հարթակներ, ծովային օբյեկտներ և հակաօդային պաշտպանության համակարգեր»։
Պայթյուններ են գրանցվել հյուսիսարևմտյան Թավրիզ քաղաքի մոտակայքում, որտեղ պետական լրատվամիջոցները հայտնել են մեկ զոհի և մի քանի վիրավորի մասին, Պարսից ծոցի Բանդար Մահշահր և Բանդար Իմամ Խոմեյնի նավահանգիստներում, ինչպես նաև Չաբահար և Քոնարաք հարավարևելյան նավահանգիստներում։
Kpler ծովային հետախուզական ընկերության նախնական տվյալների համաձայն՝ երկուշաբթի օրը վառելիքի տ լցանավ և բեռնատար նավեր անցել են Հորմուզի նեղուցով։ Այս նավերից երկուսը նախկինում ԱՄՆ-ի կողմից պատժամիջոցների տակ են եղել Իրանի հետ կապերի համար։
Երեքշաբթի օրը պետական լրատվամիջոցների հաղորդմամբ՝ Իրանի Իսլամական հեղափոխության պահապանների կորպուսը (ԻՀՊԿ) նույնպես հայտարարել է, որ թիրախավորել է Բահրեյնում գտնվող ամերիկյան Amazon ընկերությանը պատկանող տվյալների կենտրոնը։
ԻՀՊԿ-ն «մի քանի թևավոր հրթիռներով հարձակվել և ոչնչացրել է Բահրեյնում գտնվող ամերիկյան Amazon ընկերության կենտրոնական տվյալների ենթակառուցվածքը»,- հաղորդել է IRNA պետական լրատվական գործակալությունը։
Երեքշաբթի օրը ավելի ուշ Քուվեյթը հայտարարել է, որ Իրանը նախորդ օրը հարվածել է մի քանի էլեկտրաէներգիայի և ջրի աղազերծման կայանների։
Չնայած հրադադարի խզմանը՝ Թեհրանը հայտարարել է, որ դիվանագիտական հաղորդագրություններ են փոխանակվում երկու կողմերի միջև միջնորդների միջոցով։
Երեքշաբթի օրը Օվալաձև գրասենյակում ելույթ ունենալով՝ Թրամփը պնդել է, որ Իրանը ցանկանում է «հուսահատորեն հանդիպել», բայց որ «մինչև նրանք պատրաստ չլինեն իմաստալից հանդիպման, ԱՄՆ-ն հետաքրքրություն չունի»։
Թրամփը հավելել է, որ ԱՄՆ-ն «ծանր» հարված կհասցնի Կոլանգ Գազ Լա լեռանը, որը հայտնի է նաև որպես Փիքաքս լեռ, այն բանից հետո, երբ Իրանը կարող է միջուկային ցենտրիֆուգներ տեղափոխել այդ տարածք։
«Դա ոչինչ չի նշանակում, եթե նրանք չունեն [միջուկային] նյութ», — հավելել է նա։
Երկուշաբթի երեկոյան Պաշտպանության նախարարությունը հաստատել է ամերիկացի երկու զինվորների՝ 19-ամյա զինվոր Իզաբելլա Գոնսալեսի (Տեխաս) և 25-ամյա լեյտենանտ Թայլեր Ջեյմս Ֆիհանի (Հավայան կղզիներ) ինքնությունը, որոնք զոհվել էին Հորդանանում գտնվող Մուվաֆաք Սալթի բազայի վրա Իրանի կողմից կիրակի օրը հասցված հարվածի ժամանակ։
ԱՄՆ կենտրոնական հրամանատարությունն ավելի վաղ հայտարարել էր, որ հարձակումից հետո անհետ կորել է նաև երրորդ զինծառայողը։
