Երևանի երկաթուղային կայարանից մեկնել է միջազգային զբոսաշրջային հատուկ գնացքը։ Հուլիսի 4-ից 12-ը շուրջ 200 զբոսաշրջիկ, հիմնականում՝ Չեխիայից, մասնակցում են բացառիկ երկաթուղային ճանապարհորդության։ Ութօրյա տուրի ընթացքում գնացքը կշարժվի Երևան – Վանաձոր – Այրում – Թբիլիսի – Բաթումի – Երևան երթուղով։
Նախաձեռնությունը «Հարավկովկասյան երկաթուղի» (ՀԿԵ) ՓԲԸ-ի և չեխական «Gepard Express» ընկերությանն է։
ՀԿԵ մամուլի ծառայության հաղորդմամբ՝ հյուրերը կճանապարհորդեն ընկերության ժամանակակից ու հարմարավետ վագոններով։ Ուղևորության նպատակն է եվրոպացի զբոսաշրջիկներին ծանոթացնել Հայաստանի և Վրաստանի հարուստ մշակութային ու պատմական ժառանգությանը, նաև կազմակերպել այցելություններ երկու երկրների տեսարժան վայրեր։
Սա «Հարավկովկասյան երկաթուղի» ընկերության և «Gepard Express»-ի արդեն երկրորդ համատեղ զբոսաշրջային նախագիծն է։ Անցած տարի կազմակերպված անդրանիկ երթուղին արժանացել էր բազմաթիվ դրական արձագանքների՝ փաստելով եվրոպացի զբոսաշրջիկների մեծ հետաքրքրությունը Հարավային Կովկասում երկաթուղային տուրիզմի նկատմամբ։
