Կիրակի՝ ապրիլի 12-ին, Հունգարիայում մեկնարկել են խորհրդարանական ընտրությունները։
Այս ընտրությունները Եվրոպան համարում է տարվա ամենակարևորը։ Քվեարկությունը կարող է վերջ դնել Եվրամիության ամենաերկար ծառայած առաջնորդի՝ վարչապետ Վիկտոր Օրբանի, 16-ամյա կառավարմանը։
Ընտրատեղամասերը բացվել են տեղական ժամանակով ժամը 6:00-ին և նախատեսված է փակվել ժամը 19:00-ին։ Օրբանը վարչապետ է 2010 թվականից։ Նա հաղթել է չորս անընդմեջ ընտրություններում՝ իր «Ֆիդես» կուսակցության համար ապահովելով սահմանադրական մեծամասնության երկու երրորդը խորհրդարանում։
Վերջին տարիներին Օրբանի քաղաքականությունը լարվածություն է առաջացրել Եվրամիության հետ հարաբերություններում։
Մասնավորապես, նա բազմիցս օգտագործել է վետոյի իրավունքը՝ խոչընդոտելով ԵՄ որոշումների ընդունումը, այդ թվում՝ Ուկրաինային ֆինանսական աջակցության ծրագրերը։
Այս ընտրություններում Օրբանի հիմնական մրցակիցն ընդդիմադիր առաջնորդ Պետեր Մագյարն է, ով ղեկավարում է կենտրոնամետ Տիզա կուսակցությունը։
Մագյարն իր քարոզարշավը կառուցել է սոցիալական և տնտեսական խնդիրների շուրջ՝ ընդգծելով առողջապահական և տրանսպորտային համակարգերի խնդիրները, ինչպես նաև կոռուպցիայի դեմ պայքարի անհրաժեշտությունը։
Նախկինում լինելով Օրբանի դաշնակից՝ Մագյարը 2024 թվականին խզել է կապերը «Ֆիդես»-ի հետ և սկսել ակտիվ քաղաքական պայքար։ Նրա խոսքով՝ այս ընտրությունները «հանրաքվե» են այն հարցի շուրջ, թե արդյոք երկիրը կշարունակի ներկայիս քաղաքական ուղին, թե կվերադառնա եվրոպական ժողովրդավարական ուղղությանը։
Տես նաև՝ Վենսն այսօր Բուդապեշտ է ժամանում Օրբանին սատարելու նպատակով
