Ինչպես ամբողջ աշխարհում, այնպես էլ Հայաստանում սիրտ-անոթային համակարգի հիվանդությունները մնում են 21-րդ դարի բարձր հիվանդացության և մահացության հիմնական պատճառը: Ընդհանուր մահացության ավելի քան 50 տոկոսն այսօր կազմում են սիրտ-անոթային հիվանդությունները: Սակայն այսօր, ըստ սրտաբանների, նկատվում է նաև հիվանդությունների երիտասարդացում և սիրտ-անոթային խնդիրներով պայմանավորված հոսպիտալացումների քանակի աճ: Նման պատկերը փոքր-ինչ մեղմելու համար այսօր ՀՀ Գիտությունների ազգային ակադեմիայում Հայաստանի սրտաբանների ասոցիացիայի նախաձեռնությամբ մեկնարկել է եռօրյա վեհաժողով, որտեղ բժիշկների լայն շրջանակներում կքննարկվեն վերոնշյալ խնդիրները, ախտորոշման, բուժման նոր մոտեցումները:
Աշխարհում մահացության առաջին պատճառը սիրտանոթային հիվանդություններն են: Ինչպես ողջ աշխարհում, այնպես էլ Հայաստանում առավել տարածված է սրտի իշեմիկ հիվանդությունը: Մեր երկրում ընդհանուր մահացության մոտ 80 տոկոսի պատճառը սիրտ-անոթային, ուռուցքաբանական հիվանդություններն են և շաքարային դիաբետը: Առողջապահության նախարար Արմեն Մուրադյանի տվյալներով՝ վերիջին 25 տարիներին նկատվում է 70 տոկոսով հիվանդացության աճ, որն էլ ոլորտը վերահսկողը համարում է լուրջ մարտահրավեր ոչ միայն առողջապահական համակարգի, այլև ամբողջ աշխարհի համար: Հայաստանյան կլինիկական գործունեության ընթացքում կիրառվող բուժական մոտեցումներն իրականացվում են միջազգային չափանիշներին համապատասխան և Հայաստանում սրտաբանական ծառայությունը համարվում է լավագույններից, վստահեցնում է նախարարը:
«Ես հպարտությամբ կարող եմ ասել, որ սրտաբանությունը մեր երկրում մեծ քայլերով զարգացավ վերջին տասնամյակներում և այսօր մենք կարող ենք արձանագրել միջազգային որակի ամենաբարձր մակարդակով ապահովածությունը սրտային ինչպես կոնսերվատիվ, այնպես էլ ինտերնացիոն ինվազի սրտաբանությունում»:
Հայաստանի սրտաբանների ասոցիացիայի նախաձեռնած 10-րդ հոբելյանական վեհաժողովում քննարկումների մաս են կազմելու նաև սիրտ-անոթային հիվանդությունների կանխարգելման խնդիրները: Սրիտանոթային մահացությունը կանխարգելելու լավագույն ճանապարը սիրտ-անոթային ռիսկի գործոնների կանխարգելումն է, ասում է Երևանի գլխավոր սրտաբան Պարունակ Զելվեյանը: Հայաստանյան պատկերը նույնն է, ինչպես որ զարգացած երկրներում, սակայն ի տարբերություն այդ երկրների, մեզ մոտ ձևավորված չէ առողջությանը հետևելու մշակույթ: Արդյունավետ վերահսկվողների քանակը քիչ է, ասում է սրտաբանը:
Սիրտ-անոթային հիվանդություններով մահացությունների թիվը նվազեցնելու նպատակով առողջապահության նախարարությունն այս տարվա հունվարի մեկից ներդրեց սրտի անհետաձգելի վիրահատությունների ծրագիրը, որոնց կյանքի կոչման համար կառավարությունը հատկացրել է 500 միլիոն դրամ: Արդյուքները Հայաստանի գլխավոր սրտաբան Համլետ Հայրապետյանն է ներկայացնում:
«Այն բոլոր հիվանդները, ովքեր ընդունվում են կլինիկաներ սրտամկանի ինֆարկտով 12 ժամվա ընթացքում, տեղադրվում է մեկ ստենտ պետական պատվերի շրջանակներում: Արդեն պետպատվերի շրջանակներում կատարվել է ավելի քան 450 վիրահատություն: Արդյուքները վերահսկվում են նախարարի, մասնագետների կողմից: Իմ գնահատմամբ արդյուքները դրական են»:
Սիրտ-անոթային հիվանդություններից խուսափելու համար անհրաժեշտ է վարել առողջ ապրելակերպ՝ ֆիզիկական ակտիվությամբ և առողջ սննդակարգով: Առողջ կենսակերպը առողջ հասարակություն ունենալու գրավականն է:
