Բունդեսթագը ապրիլի 24- ին հրավիրում է նիստ՝ նվիրված Հայոց ցեղասպանությանը
Գերմանիայի Բունդեսթագը Հայոց ցեղասպանության 100-րդ տարելիցի կապակցությամբ ապրիլի 24-ին մեկ ժամ տևողությամբ նիստ է հրավիրելու: Օրակարգում լինելու է Հայոց ցեղասպանության վերաբերյալ բանաձև, որի մշակմամբ զբաղվող խորհրդարանում ներկայացված չորս կուսակցությունների պատգամավորներից կազմված հատուկ աշխատանքային խումբ է ձևավորվել, հայտնում է ermenihaber.am- ը։
Գերմանական «Tagesspiegel» պարբերականը տեղեկացնում է, որ ընդդիմադիր և իշխանամետ կուսակցությունների միջև բուռն քննարկում է սկսվել՝ բանաձևի նախագծում ցեղասպանություն բառի օգտագործման վերաբերյալ: Ըստ աղբյուրի՝ ընդդիմադիր «Ձախերի» և «Կանաչների» կուսակցությունները կողմ են ցեղասպանություն եզրույթի կիրառմանը, մինչդեռ իշխող կուսակցության և կուսակցական կոալիցիաների խորհրդարանական խմբերի ղեկավարները համաձայն չեն այդ մտքի հետ:
Ermenihaber-ի փոխանցմամբ՝ իշխող «Քրիստոնեական միություն» և «Սոցիալ- դեմոկրատ» կուսակցությունների՝ անցյալ շաբաթ ներկայացրած համատեղ տեքստի վերնագրում տեղ էր գտել «ցեղասպանություն» բառը: Սակայն ԱԳՆ-ի և խորհրդարանի կուսակցական խմբերի միջամտության արդյունքում տերմինը հանվել է վերնագրի հատվածից՝ թողնվելով միայն հիմնավորման բաժնում:
Նշվում է, որ տասը տարի առաջ ևս Բունդեսթագի բոլոր կուսակցությունների կողմից նմանատիպ որոշում էր ընդունվել:Գերմանական թերթի գնահատմամբ՝ հունիսին կայանալիք խորհրդարանական ընտրություններից առաջ «ցեղասպանություն» բառի օգտագործումը կարող է դիտվել որպես հարձակողական քայլ Թուրքիայի նկատմամբ: Բացի այդ՝ Թուրքիան կարևոր գործընկեր է «Իսլամական պետություն» ահաբեկչական խմբավորման դեմ պայքարում:
Ապրիլի 21-ին տեղի կունենա քվեարկություն, որի ժամանակ կոալիցիայի պատգամավորները կհաստատեն բանաձևի վերջնական տարբերակը: Ամենայն հավանաանությամբ՝ «ցեղասպանություն» բառն այլևս չի վերականգնվի վերնագրում: Սակայն նշվում է նաև, որ «Ձախերի» կուսակցության նախապատրաստած բանաձևի վերնագրում տեղ է գտել «ցեղասպանություն» բառը:
Նախատեսվում է, որ ապրիլի 24-ին Գերմանիայի խորհրդարանում կայանալիք քննարկմանն իշխանական և ընդդիմադիր կուսակցությունների կողմից կներկայացվեն բանաձևի երեք տարբեր նախագծեր: Հնարավոր է նաև, որ մինչ այդ փոխհամաձայնության գալով՝ կուսակցությունները հանդես կգան մեկ համատեղ նախագծով:
