Lufthansa- ի ղեկավարն անբացատրելի է որակում ավիաաղետը
Գերմանական Lufthansa ավիաընկերության ղեկավար Կաստերն Շպորը, որի դուստր ձեռնարկության՝ «Germanwings»- ին էր պատկանում նախօրեին կործանված Airbus A320-ը, անբացատրելի է անվանել ֆրանսիական Ալպերում տեղի ունեցածը: Այսօր Ֆրանկֆուրտի օդանավակայանում զոհվածների հիշատակին նվիրված մեկ րոպե լռությունից հետո Շպորն ասել է, որ Lufthansa-ի համար տեղի ունեցածն անբացատրելի է, քանի որ կործանված օդանավը տեխնիկապես անթերի էր:
ՀՀ նախագահը ցավակցում է Գերմանիայի եւ Իսպանիայի ղեկավարներին
Նախագահ Սերժ Սարգսյանը ցավակցական հեռագիր է հղել Գերմանիայի Դաշնային Հանրապետության նախագահ Յոախիմ Գաուկին և Իսպանիայի Թագավոր Ֆելիպե Վեցերորդին՝ Բարսելոնայից Դյուսելդորֆ ուղևորվող ինքնաթիռի աղետի կապակցությամբ, որը բազմաթիվ անմեղ զոհերի պատճառ դարձավ:
Հանրապետության նախագահը խորին ցավակցություն ու զորակցություն է հայտնել Գերմանիայի նախագահին և Իսպանիայի թագավորին, զոհվածների ընտանիքներին և Գերմանիայի ու Իսպանիայի բարեկամ ժողովուրդներին՝ այս ծանր պահին մաղթելով նրանց համբերություն և ոգու արիություն։
