Երեկ Արմավիրի մարզի 6 համայնքում կայացան ՏԻՄ ընտրություններ, որի արդյունքում գործող համայնքի ղեկավարներից չի ընտրվել Նոր Արմավիրի գյուղապետ Կարեն Գրիգորյանը: Հովտամեջ գյուղում և Արմավիր քաղաքում միայն մեկ թեկնածու էր մնացել՝ գործող ղեկավարները, իսկ Հայկավանում հինը չի առաջադրվել և այստեղ նոր ղեկավար է ընտրվել՝ «Գազպրոմ- Արմենիա»- ի Արմավիրի մասնաճյուղի ճարտարագետ Ռուբեն Ղազարյանը:
Ջրաշեն համայնքում էլ կայացել են ավագանու անդամների ընտրություններ, որին ցուցաբերվել է 55 տոկոս մասնակցություն: Արմավիր քաղաքում ընտրողներն ավելի պասիվ են եղել, քան՝ գյուղերում:
Տեղական ինքնակառավարման մարմինների ընտրություններին սովորաբար մեծ է լինում մասնակցություն: Հենց այդպես էլ ընթացան այն համայնքների ընտրությունները, որտեղ համայնքի ղեկավարի պաշտոնի համար պայքարի մեջ էին երկուական թեկնածուներ: Այս առումով ավելի բարձր ցուցանիշ գրանցվեց Նոր Արմավիր գյուղում, որտեղ գործող գյուղապետ Կարեն Գրիգորյանի հետ ընտրապայքարում էր Արթուր Ավետիսյանը:
Նոր Արմավիրում 1497- ից ընտրությանը մասնակցել է 976 ընտրող կամ մասնակցությունը կազմել է 65,1 տոկոս։ 45 քվեի տարբերությամբ գործող գյուղապետը պարտվել է Արթուր Ավետիսյանին:
Մասնակցության բարձր ցուցանիշ է գրանցվել նաև Նալբանդյան գյուղում՝ 63,1 տոկոս: Գործող գյուղապետի մրցակիցը Արգիշտի Հարությունյանն էր: 433 ձայնի առավելությամբ գործող գյուղապետ Գրիգոր Մկրտչյանը վերընտրվեց։
Հայկավան գյուղում ընտրություններն անցել են ավելի լարված մթնոլորտում, քվեարկողները գրեթե մենակ չեն եղել քվեախցում, ընտրացուցակների մոտ հիմնականում կուտակումներ են եղել, և ՀՀԿ-ից առաջադրված թեկնածու Ռուբեն Ղազարյանի կողմնակիցները շարունակ ուղղորդել են ընտրողներին քվեարկություն կատարելիս, կամ էլ օգնել են քվեարկելիս: Հայկավանում ընտրությունների նախնական տվյալներով՝ ցուցաբերվել է 59,2 տոկոս մասնակցություն։ Այստեղ 531 ձայնի առավելությամբ Ռուբեն Ղազարյանն ընտրվել է համայնքի ղեկավար:
Համեմատաբար պասիվ մասնակցություն է եղել Հովտամեջ գյուղում և Արմավիր քաղաքում, որտեղ գործող համայնքի ղեկավարները չունեին մրցակիցներ:
Հովտամեջում ընտրողների ընտրացուցակային 909 թվից մասնակցել է 353 ընտրող կամ ցուցաբերվել է 38,8 մասնակցություն: Գործող գյուղապետ Արմեն Սարգսյանին կողմ է քվեարկել 336 ընտրող, 4 դեմ, 13 անվավեր քվեաթերթեր են գրանցվել:
Արմավիր քաղաքում դարձյալ նուն պատկերն է 32,5 տոկոս մասնակցություն է ցուցաբերվել։ Նշեմ, որ Արմավիրում գրանցված 6 թեկնածուից 5-ն ինքնաբացարկ հայտնեց և գործող քաղաքապետ Ռուբեն Խլղաթյանը մնացել էր միակ թեկնածուն:
Արմավիր քաղաքում ընտրողների ընտրացուցակային թիվը 28421 ընտրող է, որոնց մեծ մասը արտերկրում է: Ընտրացուցակներում մնացել են նաև այն ընտրողները, ովքեր տարիներ առաջ վաճառել են տները և տեղափոխվել այլ հասցեներ բնակվելու: Արմավիր քաղաքում գործել է 16 ընտրական տեղամաս, որտեղ մեծ մասամբ ընտողների մասնակցությունը տատանվել է 18-25 տոկոսի միջև, սակայն 2 ընտրատեղամասերում գրանցվել է ռեկորդային ցուցանիշ 21/14 ում ՝66 տոկոս մասնակցություն, 21/13-ում 62,5 տոկոս, 21/5-ում՝ 57,6 տոկոս:
Ընտրությանը մասնակից 9246 ընտրողից Ռուբեն Խլղաթյանին կողմ է քվեարկել 8169 ընտրող, դեմ 810-ը, անվավեր է ճանաչվել 265 քվեաթերթիկ:
Ընտրություններն Արմավիրում սկսվել ու ավարտվել են սահմանված ժամին: Ընդհանուր առմամբ՝ Արմավիր քաղաքում ընտրություններն անցել են հանգիստ, առանց արտառոց միջադեպերի, սակայն նկատվել են խախտումներ, որոնք գրանցել են դիտորդական առաքելություն իրականացնող հասարակական կազմակերպությունները:
Ընտրողների ակտիվություն նկատվել է կեսօրից հետո 2-3 ժամվա ընթացքում, ինչպես նաև երեկոյան ժամերին: Արմավիր քաղաքի 21/3 տեղամասային ընտրական հանձնաժողովի նախագահ Սաշա Վարդանյանը նշեց, որ մասնակիցների ակտիվություն նկատվել է առավոտյան ժամը 8-ին, , հետո 11-13-ն ընկած ժամանակահատվածում, ինչպես նաև երեկոյան 18- ից 19-30 –ը:
Այս ընտրատեղամասում առավել ակտիվ էր հանձնաժողովի 2 անդամ ՝ ԲՀԿ ներկայացուցիչն ու ԸԸՀ-ից նշանակված ՀՀԿ Բաղրամյանի երիտթևի ներկայացուցիչը, որոնք շարունակ հայտնվում էին ընտրացուցակների մոտ ուղղորդում ընտրողներին, կամ դուրս էին գալիս ընտրատեղամասից և զանգերի միջոցով ընտրողներ բերում քվեարկության: Այս ամենը չի վրիպել ընտրությանը հետևող լրագրողների և դիտորդների աչքից, սակայն աչք էր փակել հանձնաժողովի նախագահը:
Տիգրան Բալայանը ընտրությանը հետևել է առավոտյան ժամը 7-ից և նկատելով թերությունները ահազանգել էր 21-րդ ԸԸՆ նախագահին, սակայն զգուշացումից հետո նույնը կրկնվել է: Այս ընտրատեղամասում ՀՀԿ Արմավիրի երիտթևի նախագահը փորձել էր քվեարկություն կատարել մոր փոխարեն, որը նույնպես կանխվել էր դիտորդի զգուշացմամբ: Գրանցվելուց հետո քվերկություն չկատարվեց, սխալն ուղղվեց քվերկողն իր անձնագրով ներկայանալու դեպքում: Այլ ընտրատեղամասում էլ կրկնակի քվեարկություն է կատարել նույն մարդը:
Դիտորդներն իրենց դիտարկումները կներկայացնեն ավելի ուշ: Իսկ այսօր մինչև ժամը 18-00 Արմավիրի մարզի 20 և 21 ԸԸ հանձնաժողովները կսպասեն բողոքների ներկայացմանը:
