Հռոմի Ֆրանցիսկոս պապը վավերացրել է Սրբերի դատի ժողովի կարդինալական դասի եպիսկոպոսների լիագումար նիստի «Սուրբ Գրիգոր Նարեկացուն Տիեզերական եկեղեցու վարդապետ» շնորհելու որոշումը: Նրա ստեղծագործություններից «Մատյան ողբերգությունը» հայտնի է որպես աղոթագիրք: Որոշման վերաբերյալ այսօր իրենց մեկնաբանություններն են հնչեցրել գրքի թարգմանիչն ու հոգևորականը, որոնց կարծիքով կաթողիկե եկեղեցու որոշումը բխում է նրանից, որ Նարեկացին կարողացել է վերծանել մարդկության գաղտնիքներն ու ցույց տալ մեղսագործությունից ազատվելու ճանապարհը:
Գրիգոր Նարեկացին հայ սրբերից առաջինն է, ում Հռոմի կաթողիկե եկեղեցին շնորհել է Տիեզերական եկեղեցում վարդապետի տիտղոս: Մինչ այժմ կաթողիկե եկեղեցին ունեցել է 35 վարդապետ՝ 31 տղամարդ, 4 կին: 16-րդ դարից սրբերի ցանկը սկսել է համալրվել հիմնականում լատին սրբերով, իսկ 17-րդ դարից սուրբ հռչակելու մենաշնորհը ստանձնել է Պապը: 2000 տարվա պատմության մեջ Գրիգոր Նարեկացին 36-րդն է , ով ճանաչվել է Տիեզերական եկեղեցու վարդապետ:
«Վարդապետ եկեղեցվո նշանակվում է այն սուրբը, որը մեծ ներդրում ունի աստվածաբանական եկեղեցու համար, մեծ ներդրում ունի նաև ժողովուրդի բարեպաշտության մեջ, մեծ ազդեցություն և դեր է խաղացել եկեղեցու և ժողովուրդի հոգևոր կյանքի մեջ»:
Համաշխարհային պատմության մեջ անզուգական դեմքերից Գրիգոր Նարեկացու ժառանգորդ համարվելը պատասխանատու կոչում է, պետք է հասկանալ նրա թողած ժառանգության արժեքն ու խորհուրդը, ասում է Մատյան ողբերգության թարգմանիչ Աշոտ Պետրոսյանը: Կաթողիկե եկեղեցին այդ քայլին է գնացել, քանի որ Գրիգոր Նարեկացին կարողացել է վերծանել ամբողջ մարդկության հոգեբանությունն ու գաղտնքիները, ցույց տալ նրա մեղսական բնույթն ու էությունը և մեղքերից ացատվելու ճանապարհը: Նարեկն այսօր համառոտված փոքր Աստվածաշունչ է:
Նարեկը թարգմանված է մոտ 32 լեզուներով և ըստ Գյումրիի ու Աշոցքի շրջանի ժողովրդապետ հայր Պետրոս վարդապետ Եսայանի՝ օտարերկրացին կարդալով Նարեկացու հայտնի գործերից «Մատյան ողբերգությունը» առաջնորդվում է նրա աղոթքով: Նարեկը հայերիս մեջ էլ է սիրված: Այն հիմնականում ընթերցում են Մեծ Պահքի շրջանում և փորձում Գրիգոր Նարեկացու աղոթքով ու ապաշխարհությամբ ուղղվել առ Աստված և դաստիարակել իրենց հոգիները, կարծում է հոգևորականը:
Որոշման մասին Պապը կհայտարարի ապրիլին Վատիկանում հայոց ցեղասպանության զոհերի հիշատակին մատուցվող պատարագի ժամանակ:
