Հասարակություն

Հակառակորդը միայն հասկանում է պատժի լեզուն. Սեյրան Օհանյան

arminegevorgyan

«Մեր հարևանները իրենց ագրեսիվ  պահվածքով ու վերջին դիվերսիոն գործողություններով փորձում են ազդել առաջին հերթին միջազգային կառույցների վրա, որպեսզի Հայաստանն ավելի մեծ զիջումների գնա ԼՂՀ  հակամարտության կարգավորման հարցում: Սակայն Ադրբեջանական կողմը չի հասկանում, որ երկխոսությունն է այն միակ ձևը, որը կարող է բերել խաղաղ քաղաքական պայմաններով հարցի լուծմանը: Հակառակորդը միայն հասկանում է պատժի լեզուն»,-  այսօր ՀՀ ԶՈՒ կազմավորման 23-րդ տարեդարձի կապակցությամբ Եռաբլուր զինվորական պանթեոնում  լրագրողների հետ զրույցում ասաց ՀՀ պաշտպանության նախարար Սեյրան Օհանյանը:

ՀՀ վարչապետ Հովիկ Աբրահամյանն էլ լրագրողների հետ զրույցում շեշտեց՝ տարածաշրջանի  ամենահզոր բանակը մերն է  ու սա է մեր ամենակարևոր ձեռքբերումը.  կառավարության ղեկավարը վերջին օրերի լարավածությունը  համարեց, ոչ թե պատերազմի վերսկսման վտանգ, այլ ադրբեջանական սադրանք:

ՀՀ ոստիկանապետ Վլադիմիր Գասպարյանն էլ  հիշեցրեց, որ իր կենսագրության կեսը թողել է բանակում  և հիմա էլ շարունակում է գործել՝  հանուն Հայոց բանակի,  այն իր ընտանիքն է:

«Ոստիկանությունն այսօր ունի ուժեղ բանակ, իսկ բանակն էլ՝ ուժեղ ոստիկանություն»: Սահմանային միջադեպերի պահով էլ նկատեց, թե պետք է լուրջ չվերաբերվել, բայց չմոռանալ, թե ով է թշնամին.  «Ադրբեջանցիներ են, էլի՛»:

Ամենայն Հայոց Կաթողիկոս Գարեգին Երկրորդն էլ վստահեցրեց, որ հոգևորականներն առ Աստված շնորհակալական աղոթք են բարձրացնում այսօր մեզ տրված հարաբերական խաղաղության համար.

«Մեր բանակը պետք է համարժեք  գործողություններով կարողանա զսպել ադրբեջանական կողմի սադրանքները»:

Իսկ ահա ԵԿմ վարչության նախագահ գեներալ  Մանվել Գրիգորյանն  էլ նկատում  է, որ  600 տարուց ավելի  մուսուլմանները մեզ տարբեր առիթներով ճնշել են, ցեղասպանություն են արել:  Բայց մեր բախտը մեզ հետ է: Գեներալ Մանվելի խոսքը շարունակեց  մեկ այլ գեներալ պատգամավոր Սեյրան Սարոյանը:

«Մենք պատերազմ չենք սկսում, բայց եթե սկսեցին պատասխան կստանան»:

Լրագրողներից մեկը նկատեց, որ ազատամարտիկների մի զանգված նեղված է հայրենի իշխանություններից, արդյոք հնարավո՞ր է, որ թշնամին դրանից օգտվի, Մանվել Գրիգորյանն ասաց, որ թշնամին ամեն ինչի էլ օգտվում է:

«Ազատամարտիկները հարցեր ունեն, թող իրանց հարցերը բարձրացնեն, լուծումներն էլ ստանան: Այո, այսօր երկրում լիքը խնդիրներ կան, ինչի միայն ազատամարտիկների, ժողովուրդն այսօր խնդիրներ ունի պիտի լուծվի, ազատամարտիկին ժողովրդից մի բաժանեք, էդ ազատաամարտիկը էդ ժողովրդի զավակն է»:

Դիտարկմանը, թե ինքն էլ Ազգային ժողովի պատգամավոր է, Մանվել Գրիգորյանն ասաց՝ քաղաքականությունն ուրիշ է, պատգամավորությունն` ուրիշ:  Նա Ազգային ժողովում է, որպեսզի բարձրացնի «ազատամարտիկների հարցերը»:

Back to top button