Անցած տարի Արմավիրի մարզում գրանցվել է 585 արտակարգ դեպք, որի 60 տոկոսը` թունավորում: Եղել են նաև հրդեհներ, ջրահեղձում և այլ արտակարգ դեպքեր, որին արձագանքնել են մարզային փրկարարները: Տարածքային կառավարման և արտակարգ իրավիճակների նախարարության փրկարար ծառայության Արմավիրի մարզային փրկարարական վարչությունը ամփոփել է 2014 թվականի գործունեությունը , որը գնահատվել է բավարար: 2015 թվականին նախատեսվում է բարելավել 911 ծառայությունը, որը օգնություն ցույց կտա տարբեր իրավիճակներում հայտնված մարդկանց, կստեղծվեն ճգնաժամային կառավարման կենտրոններ, իսկ հեռավոր գյուղերում էլ կկազմավորվեն կամավոր փրկարար ջոկատներ՝ արտակարգ իրավիճակներին արագ արձագանքելու նպատակով:
Տարածքային կառավարման և արտակարգ իրավիճակների նախարարության փրկարար ծառայության Արմավիրի մարզային փրկարարական վարչության պետ, փրկարար ծառայության գնդապետ Արմեն Ամիրջանյանը ներկայացրեց անցած տարվա ստացած ահազանգեր, որտեղ չեն բացառվել դժբախտ դեպքերը: Մարդիկ զոհվել են գազաբալոնի պայթյունից, ջրահեղձվել են, հոսանքահարվել, հայտնաբերվել է նաև 3 դի: Տարվա ընթացքում զերծ չեն մնացել նաև հրդեհներից, որից գրանցվել է 2 զոհ: Գերակշռող մասը խոտածածկ տարածքների հրդեհներ են եղել:
Քաղպաշտպանության գործում կարևոր նշանակություն ունի կապի և ազդարարաման սարքերի առկայությունը, սակայն ահազանգման նախկին սարքավորումները չեն համապատասխանում թվայնացված նոր տեխնոլոգիաներին և անհրաժեշտ է դրանք փոխարինել նորագույն սարքավորումներով:
Անսարք է նաև ջրածածկման գոտու 20 համայնքում տեղադրված վաղ ազդարարաման 22 սարքավորումներից հինգը:
Հաշվետու տարում կազմակերպվել են տարբեր ուսումնական վարժություններ, հետևել են փրկարարաների մարտական պատրաստվածությանը: Արմավիրի մարզից 2014 թվականին «Լավագույնն ըստ մասնագիտության» մրցույթի հաղթող է ճանաչվել հրշեջ-փրկարար Արգամ Դավթյանը:
2015 թվականին փրկարար ծառայության հիմնական խնդիրներից մեկը լինելու է 911 ծառայության բարելավումը: ԱԻՆ աշխատակազմի ղեկավար Համլետ Հակոբյանը նշեց, որ յուրաքանչյուր ոք արտակարգ իրավիճակում հայտնվելիս պետք է միայն մեկ համար իմանա՝ 911:
Մարզերում ստեղծվելու են ճգնաժամային կառավարման կենտրոններ: Արմավիրի մարզում կենտրոնի համար նախատեսված տարածքը հիմնանորգվել է: Սահմանամերձ ու կենտրոնից հեռու համայնքներում ստեղծվելու են կամավոր փրկարարական ջոկատներ: Համլետ Հակոբյանը Արմավիրի մարզային փրկարարական վարչությանն ու արտակարգ իրավիճակների նախարարության Արմավիրի մարզային մյուս ստորաբաժանումներին առաջարկեց համատեղ աշխատել, որն ավելի արդյունավետ կլինի:
