Չինաստանի նախագահ Սի Ցզինպինը Պեկինում ԱՄՆ նախագահ Դոնալդ Թրամփի հետ հանդիպման ընթացքում զգուշացրել է, որ Թայվանի հարցում անզգույշ քայլերը կարող են լուրջ սրել Վաշինգտոն-Պեկին հարաբերությունները՝ նույնիսկ հանգեցնելով բաց հակամարտության։
Չինական պետական լրատվամիջոցների փոխանցմամբ՝ Սին հայտարարել է, որ Թայվանի հարցը Չինաստան-ԱՄՆ հարաբերություններում «ամենազգայուն և ամենակարևոր հարցն» է։ Նրա խոսքով՝ եթե այս հարցը ճիշտ կառավարվի, երկկողմ հարաբերությունները կարող են պահպանել կայունությունը, սակայն սխալ մոտեցման դեպքում հնարավոր է բախում, որը երկու երկրների հարաբերությունները կհասցնի վտանգավոր մակարդակի։
Սի Ցզինպինը նաև ընդգծել է, որ Թայվանի անկախության գաղափարն անհամատեղելի է տարածաշրջանային խաղաղության հետ և կոչ արել ԱՄՆ-ին վերանայել Թայվանին զենքի վաճառքի քաղաքականությունը, որը Պեկինը համարում է իր ինքնիշխանության խախտում։
Երկու ժամ տևած բանակցությունները, որոնք սպասվում էր՝ կկենտրոնանան առևտրային հարաբերությունների և Իրանի շուրջ զարգացումների վրա, փաստացի ընդգրկել են նաև աշխարհաքաղաքական ամենազգայուն թեմաներից մեկը՝ Թայվանը։
Հանդիպումից հետո Դոնալդ Թրամփը դրական է գնահատել բանակցությունները՝ հայտարարելով, որ ԱՄՆ-ն և Չինաստանը կարող են ունենալ «հիանալի համատեղ ապագա»։ Նա Սի Ցզինպինին անվանել է «մեծ առաջնորդ» և «ընկեր», սակայն հրապարակայնորեն չի արձագանքել Թայվանի վերաբերյալ հնչած կոշտ զգուշացումներին։
Ավելի ուշ Սպիտակ տունը հայտարարել է, որ երկու երկրների առաջնորդները քննարկել են ԱՄՆ-ի և Չինաստանի միջև տնտեսական համագործակցության խորացման հնարավորությունները, այդ թվում՝ ամերիկյան ընկերությունների համար չինական շուկա մուտքի ընդլայնումն ու Չինաստանի կողմից ամերիկյան արդյունաբերություններում ներդրումների ավելացումը։
