Ռուսաստանի կառավարությունն արգելել է արտասահմանյան արբանյակներից ազդանշաններ ստանալու և փոխանցելու սարքավորումների, այդ թվում՝ կրկնակի օգտագործման սարքավորումների ներմուծումը։ Արգելքը վերաբերում է նաև Starlink տերմինալներին: Ապրիլի 29-ին ընդունված կառավարության որոշումը իրավական տեղեկատվության պորտալում հրապարակվել է հինգշաբթի՝ ապրիլի 30-ին։
«Արգելվում է Ռուսաստանի Դաշնություն ներմուծել ռադիոէլեկտրոնային սարքավորումներ, որոնք նախատեսված են հավելվածում թվարկված օտարերկրյա երկրների տիեզերական կապի օբյեկտներից (կապի արբանյակներից) ռադիոալիքներ փոխանցելու և/կամ ստանալու համար, որոնք չունեն Ռադիոհաճախականության պետական հանձնաժողովի որոշում ռադիոհաճախականության գոտիների բաշխման վերաբերյալ»,-նշված է որոշման մեջ։
Վերջին մի քանի ամիսների ընթացքում Ռուսաստանի իշխանությունները սահմանափակում են օգտատերերի մուտքը առցանց բովանդակությանը։ Ռուսաստանի թվային զարգացման, կապի և զանգվածային լրատվության նախարարությունն արդեն հանձնարարել է հեռահաղորդակցության օպերատորներին մեխանիզմներ մշակել միջազգային ինտերնետային տրաֆիկի վճարների գանձման համար։
Ավելին, իշխանությունները միջոցներ են ձեռնարկում Ռուսաստանում VPN հավելվածներին և Telegram մեսենջերին մուտքը խոչընդոտելու համար։ Դիտորդները կարծում են, որ Telegram-ի լիակատար արգելափակումը միայն ժամանակի հարց է։
Լևադա կենտրոնի վերջին հարցման համաձայն՝ ռուսների գրեթե 80%-ը խնդիրներ է ունեցել բջջային ինտերնետին մուտք գործելու հետ կապված։ RKS Global-ի փորձագետները կանխատեսում են, որ Ռուսաստանում «սպիտակ ցուցակի» ինտերնետին լիակատար անցումը կարող է տեղի ունենալ մինչև 2028 թվականը, ըստ The Moscow Times-ի։
