Այս տարվա Վենետիկի բիենալեի մրցանակային ժյուրին հինգշաբթի հրաժարական է տվել՝ ցուցահանդեսի բացումից ընդամենը ինը օր առաջ, այն բանից հետո, երբ մեծ աղմուկ էր բարձրացել իրենց կայացրած վիճահարույց որոշման շուրջ, գրում է The New York Times-ը։
Հինգ անդամից բաղկացած ժյուրին ավելի վաղ հայտարարել էր, որ մրցանակներ չի շնորհելու այն երկրների արվեստագետներին, որոնց առաջնորդները հետաքննվում են Միջազգային քրեական դատարանի կողմից։ Այս հայտարարությունը լուրջ քննադատության էր արժանացել՝ հատկապես քաղաքականացված մոտեցման համար։
E-flux արվեստի հարթակում հրապարակված կարճ հաղորդագրության մեջ ժյուրին նշել է, որ հրաժարական է տալիս՝ ապրիլի 23-ին արված իր հայտարարության պատճառով՝ չներկայացնելով լրացուցիչ բացատրություններ։
Միջազգային քրեական դատարանը ձերբակալման օրդեր է տվել Իսրայելի վարչապետ Բենիամին Նեթանյահուի և նախկին պաշտպանության նախարար Յոավ Գալանտի նկատմամբ՝ Գազայում իրականացված գործողությունների համար ռազմական հանցագործությունների մեղադրանքով։
Նման օրդեր կա նաև Ռուսաստանի նախագահ Վլադիմիր Պուտինի նկատմամբ՝ Ուկրաինայի պատերազմի պատճառով։
Սակայն սկանդալի հիմնական կենտրոնում Իսրայելն էր։ Իսրայելի արտաքին գործերի նախարարությունը X հարթակում տարածած հայտարարությամբ նշել է, որ նման որոշումը «Բիենալեն ազատ գեղարվեստական տարածքից վերածում է հակաիսրայելական քաղաքական ինդոկտրինացիայի հարթակի»։
