Հասարակություն

Եղվարդի մանկապարտեզում թունավորված երեխաներից ևս 9-ը դուրս է գրվել հիվանդանոցից

Նոյեմբերի 28-ին Եղվարդի մանկապարտեզում թունավորման հետևանքով Կոտայքի մարզի Նաիրիի բժշկական կենտրոնում բուժվող երեխաներից ևս 9-ն ապաքինվել և դուրս է գրվել։ Այս մասին հաղորդում է ՀՀ առողջապահության նախարարության լրատվական ծառայությունից:

Դեռևս հիվանդանոցում գտնվող 24 երեխայի և 2 մեծահասակի (դայակ և դաստիարակ) վիճակը մասնագետները գնահատում են բավարար։

Առողջական դրական տեղաշարժեր կան նաև «Նորք» ինֆեկցիոն հիվանդանոցում բուժվող 18 և «Սուրբ Աստվածամայր» բժշկական կենտրոնում բուժվող մեկ երեխայի մոտ։

Ամբուլատոր պայմաններում սպասարկվում է 33 երեխա։ Նրանք ունեն հիվանդության արտահայտության թույլ նշաններ։

Առողջապահական հիմնարկների արագ արձագանքման և ժամանակին իրականացված միջոցառումների շնորհիվ Եղվարդի մանկապարտեզի լոկալ բռնկումը տարածում չի ունեցել, ինչպես նաև՝ ծանր դեպքեր չեն արձանագրվել։ Հակահամաճարակային և կանխարգելիչ միջոցառումները շարունակվում են։

Երեխաների առողջական վիճակը շարունակում է գտնվել ՀՀ առողջապահության նախարարի անմիջական հսկողության ներքո:

Հիշեցնենք, որ այսօր հրավիրված մամուլի ասուլիսի ընթացքում առողջապահության փոխնախարար Վահան Պողոսյանն ասել էր, թե հիվանդության տեսակը հայտարարվել է դիզինտերիա, որի առնչությամբ համապատասխան միջոցառումներ են իրականացվել:

«Հիվանդությունը այդքան խորը չէր, ուստի կարողացանք ժամանակին կանխարգելել և համապատասխան բուժօգնություն տրամադրել երեխաներին»,- նշել էր փոխնախարարը՝ հավելելով, որ նախնական տվյալների համաձայն՝ հիվանդությունը կապված է մանկապարտեզում սննդի հիգիենայի պայմանների վերահսկման և կազմակերպման հետ:

Back to top button