Լենա Բադեյան
«Ռադիոլուր»
«Ադրբեջանի Հանրապետության պետական կոշտ դիրքորոշումը, բանականության բացակայությունը եւ մարդասիրական նորմերի բացակայությունը՝ ուղղաթիռի խոցումը եւ խոցումից հետո համապատասխան միջոցառումների կատարումից հրաժարվելը ստիպել է ՊԲ ղեկավարությանը դիմել հատուկ գործողությունների: Նրանց զինծառայողների հմուտ գործողությունների արդյունքում դիտարկվել է ուղղաթիռի ընկած վայրը, դուրս բերվել զինծառայողներից մեկի դին եւ մյուսի մասունքները, նաեւ հետագայում ճիշտ հետաքննություն անցկացնելու համար նաեւ ուղղաթիռի կարեւոր մասերից մի քանիսը: Այդ ընթացքում հակառակորդի կողմից կազմակերպված ծուղակը ամբողջովին ոչնչացվել է ՊԲ զինծառայողների կողմից»,- այսօր հայտնեց ՀՀ պաշտպանության նախարար Սեյրան Օհանյանը ՀՀ ԶՈՒ ռազմական հետախուզության ստեղծման 22- րդ տարեդարձին նվիրված արարողության ժամանակ։
Այդ առիթով Քանաթեռի զորամասում կազմակերպվել էին զորավարժություններ: Շնորհավորանքները եւ պարգեւատրումները շատ էին, սակայն հայ հետախույզները կարեւոր նվերը մատուցեցին իրենք իրենց: Այսօր հենց հետախույզների աշխատանքի շնորհիվ է, որ վերջապես դուրս են բերվել ղարաբաղա-ադրբեջանական սահմանում խոցված ուղղաթիռի անձնակազմի մարմինները։
Զոհված էդայուների ընտանիքներին եւս մեկ անգամ ցավակցություն հայտնելով՝ նախարար Օհանյանը միաժամանակ նշեց, որ հպարտանում է Պաշտպանության բանակի հատուկ նշանակության ստորաբաժանումների զինծառայողներով, ովքեր իրենց առջեւ դրված բարդ խնդիրը կատարեցին պատվով:
Ռազմական հետախուզության հատուկ ստորաբաժանումների զինծառայողներն այսօր մեկ ժամից ավելի ցուցադրում էին, թե ինչի են ընդունակ եւ ինչպես կարող են կատարել տարբեր հանձնարարությունները: Այս գործում ավագ գործընկերներին էին միացել նաեւ «Փոքր Մհեր» կրթահամալիրի սաները, ովքեր իրենց ճարպկությամբ եւ հնարհքներով չէին զիջում ավագ զինծառայողներին:
