Քաղաքական

Լեռնային Ղարաբաղում լայնամասշտաբ պատերազմը ներկայումս անհնար է. քաղաքագետ

Կարեն Ղազարյան
«Ռադիոլուր»

Անդրադառնալով ԼՂՀ զինված ուժերի ուղղաթիռը խոցելու դեպքից հետո պատերազմի վերսկսման հավանականությանն առնչվող հարցին՝ լրագրողների հետ այսօրվա հանդիպման ժամանակ «Կովկաս» ինստիտուտի տնօրեն Ալեքսանդր Իսկանդարյանը համոզմունք է հայտնել, որ Լեռնային Ղարաբաղում լայնամասշտաբ պատերազմը ներկայումս անհնար է: Վերլուծաբանի խոսքով՝ նման զարգացման համար բոլորովին այլ պայմաններ պետք է լինեն, մինչդեռ՝ մեր տարածաշրջանում խաղացողների շարքում լրջորեն պատերազմ ցանկացողներ չկան: Քաղաքագետի խոսքով, սակայն, հնարավոր են տարբեր կտրուկ արձագանքներ մի կողմից, հետո մյուս կողմից: «Այսինքն, սահմանին կլինի ճգնաժամի անցում կրակոցների ու միջադեպերի նոր փուլի, բայց ոչ լայնամասշտաբ պատերազմի»,-շեշտել է «Կովկաս» ինստիտուտի տնօրենը: Ըստ նրա՝ Ադրբեջանական բանակի կողմից ԼՂՀ ԶՈՒ ուղղաթիռի խոցումը օգոստոսյան դեպքերի արձագանքն է եւ զինադադարի ռեժիմի խախտումը պատահական չէ:

«Դա ներվային արձագանք էր եւ Բաքվի ներվային արձագանքն էր ու ոչ թե՝ ինչ-որ մի սերժանտի կամ լեյտենանտի: Բնականաբար, նա ունի ջղաձգվելու բազմաթիվ պատճառներ, մասնավորապես՝ այն պարտությունը, որ Ադրբեջանը կրեց օգոստոսի սկզբներին:

Փորձը ցույց է տալիս, որ հայկական կողմերի արձագանքը նման դեպքերին մշտապես լինում է բավականին կոշտ: Սովորաբար, միշտ էլ զոհվածների ընդհանուր թիվը ադրբեջանական կողմում շատ է լինում: Բայց եթե հայկական կողմերի արձագանքը լինի զուտ ռազմական բնույթի, ապա արդյունքի չի հանգեցնի: Արձագանքը չպետք է լինի նաեւ զուտ դիվանագիտական:

Ինչ վերաբերում է միջազգային հանրության արձագանքներին: Դրանք լիովին բնական էին: Նրանց խնդիրը ինչ որ մեկին պատժելը չէ, եւ ճշմարտությունը աչքերի մեջ ասելը չէ: Միջազգային կազմակերպությունների ներկայացուցիչների խնդիրը ստատուս-քվոն պահպանելն ու Մինսկի /բանակցային/ գործընթացը շարունակելն է»:

Back to top button