Ալիսա Գեւորգյան
Լիլիթ Մուրադյան
«Ռադիոլուր»
Տասը տարվա անպտուղ քննարկումներից հետո ԱԺ-ում վերջերս կրկին հայտնվել է «Թատրոնի մասին» օրենքի նոր նախագիծ: Հեղինակը ՕԵԿ խմբակցության ղեկավար Հեղինե Բիշարյան է, ով ԱԺ համապատասխան հանաձնաժողովում տեղի ունեցած քննարկման ժամանակ վստահեցրել է, որ ներկայացրել է լավ մշակված նախագիծ, որի շուրջ ասելիք այլևս չկա:
Նշենք, որ ըստ մամուլի մեր գործընկերների, մշակույթի փոխնախարար Արթուր Պողոսյանը բացասական է արտահայտվել նախագծի վերաբերյալ՝ նշելով, որ «2008 թվականից աշխատում եմ նախարարությունում և նախագծի շուրջ ոչ մի քննարկում չի եղել»։
«Թատրոնի մասին» օրենքի վերջին նախագծից անտեղյակ է նաև Հովհ, Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը, ով քաջածանոթ է այդ օրինագծի տասնամյա դեգերումներին։
Բաբայանի ձևակերպմամբ թատրոնին դեկլարատիվ օրենքներ պետք չեն: Պետք են գործնական օրենքներ կամ էլ գործող օրենքներում անհրաժետ փոփոխություններ, որոնք կբխեն այս ոլորտի առանձնահատկություններից:
