Ուկրաինացի զինվորականները այս գիշեր հայտնել են ռուսական կողմից զանգվածային գրոհի մասին։ «Ուկրաինսկայա պրավդան», երկրի օդային ուժերի հաղորդումները վկայակոչելով, հայտնում է, որ Ռուսաստանը կիրառել է ծովային բազավորման թեւավոր հրթիռներ եւ մեծ քանակի ԱԹՍ-ներ։ Գրոհներն արձանագրվել է Ուկրաինայի արեւելյան, հյուսիսային, հարավային եւ կենտրոնական շրջաններում։
Տեղական ժամանակով 00։58-ին Ուկրաինական ուժերը հայտնել են Կիեւի ուղղությամբ բալիստիկ հրթիռների կիրառման մասին։
Կիեւի քաղաքապետ Վիտալի Կլիչկոն հայտնել է, որ հարձակման հետեւանքով Պեչյորսկի շրջանում 22 հարկանի շենք է հրդեհվել, փլուզվել են մի քանի հարկեր։
Ավելի ուշ Կիեւի քաղաքային ռազմական վարչակազմի ղեկավարն է զգուշացրել, որ այս հատվածից հետո երկնքում նկատվել են ԱԹՍ-ներ։
Իր հերթին ռուսական կողմը հաղորդել է ուկրաինական զանգվածային գրոհների մասին։
Կրասնոդարի երկրամասի օպերատիվ շտաբը հայտնել է Նովոռոսիյսկում 16 հարկանի շենքի ուղղությամբ ԱԹՍ-ի հարվածի մասին։ Ուկրաինական ԱԹՍ-ներ նկատվել են նաեւ Գելենջիկում, Տագանրոգի մարզում։
Ռոսավիացիան դադարեցրել է Սոչիի, Գելենջիկի եւ Կրանսոդարի օդանավակայաններում թռիչքները։
Կողմերը հայտնում են մեկական զոհի մասին։
Այս ֆոնին AFP-ն, հղում անելով իր բարձրաստիճան աղբյուրներին, հայտնում է, որ ԱՄՆ-ն Ժնեւում խաղաղության ամերիկյան ծրագրի շուրջ բանակցությունների ժամանակ ճնշում է գործադրել Ուկրաինայի վրա։
Թեեւ բանակցությունների ընթացքում Վաշինգտոնի կողմից ճնշումը նվազել է, սակայն «ընդհանուր ճնշումը» պահպանվել է, գործակալությանը հայտնել է բանակցությունների ընթացքին ծանոթ զրուցակիցը։
