Գեղարվեստի Ակադեմիայի Բոյաջյան ցուցասրահում օրերս բացվել է նկարիչ Ցոլակ Թոփչյանի «Անկայուն կյանքի գրաֆիկան» խորագրով ցուցահանդեսը։ Այս ցուցադրությամբ մեկնարկում է ցուցասրահի «Ակադեմիայի շրջանավարտներ» շարքը։
Կուրատորական տեքստում նշվում է, որ ցուցահանդեսը հղում է անում հետանկախության շրջանի տագնապալի ու ցնցումներով լի ժամանակին։
Բոյաջյան ցուցասրահի ղեկավար և ցուցահանդեսի կուրատոր Նարե Սահակյանը մեկնաբանում է. «Ցոլակի աշխատանքներն ինձ համար, կարծես, անկայունությունը «դարմանելու» փորձ է մակերեսի վրա։ Գրաֆիկական աշխատանքը բազմապատկված մակերեսներով և այդ մակերեսների վրա երևում է նկարչի՝ ժամանակի ցնցումը կայունացնելու փորձը»։
Արտերկրում բնակվող Ցոլակ Թոփչյանը, խոսելով աշխատանքների գաղափարի մասին, նշել է, որ սկզբնական շարքերը եղել են ժամանակ գտնելու, կյանքի ռիթմից կտրվելու և մտածելու հնարավորություն ստեղծելու մասին, որոնք հետագայում վերածվել են տարածական գրաֆիկայի և կտորների հետ աշխատանքի։
Նարե Սահակյանն ընդգծում է, որ ցուցահանդեսը կարևոր է դիտել նաև նախորդ ցուցադրության հետ կապի մեջ, որը ցույց է տալիս այն ուղին, որ կարող է բռնել Ակադեմիայի շրջանավարտը միջազգային արվեստի դաշտում։ Ցուցահանդեսը Բոյաջյան ցուցասրահում կտևի մինչև նոյեմբերի 28-ը։
