Բուդապեշտը Եվրոպայում ամենահարմարն է Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպման համար, նրանց անհրաժեշտ էր բանակցել կանխատեսելի միջավայրում, հայտարարել է Հունգարիայի վարչապետ Վիկտոր Օրբանը՝ ելույթ ունենալով «Ռադիո Կոշութ» առավոտյան ծրագրում։
Նա նշել է, որ ուրբաթ օրը պլանավորում է հեռախոսազրույց ունենալ Պուտինի հետ, իսկ հինգշաբթի երեկոյան Թրամփի հետ հեռախոսազրույցում քննարկել է առաջիկա գագաթնաժողովի նախապատրաստական աշխատանքները։
«Եվրոպայում այլ տեղ չկա, որտեղ դա կարելի էր անել։ Բուդապեշտը Եվրոպայում միակ հարմար վայրն է դրա համար, իսկ Հունգարիան Եվրոպայում միակ երկիրն է, որը պաշտպանում է խաղաղությունը», — հայտարարել է Օրբանը՝ հավելելով, որ Վատիկանը նույնպես խաղաղասեր եվրոպական պետությունների շարքում է։
Հինգշաբթի, Պուտինի հետ հեռախոսազրույցից հետո, Թրամփը հայտարարել էր, որ համաձայնել են հանդիպել Բուդապեշտում: Ռուսաստանի նախագահի օգնական Յուրի Ուշակովը նույնպես ասել է, որ Մոսկվան և Վաշինգտոնը «անհապաղ» կսկսեն նախապատրաստվել Ռուսաստանի և ԱՄՆ առաջնորդների նոր հանդիպմանը, որը կարող է տեղի ունենալ Հունգարիայի մայրաքաղաքում: «Սա իսկապես կարևոր պահ է»,- նշել էր նա:
