ԵՄ-ն կօգտագործի ուկրաինական տեխնոլոգիաները անօդաչու սարքերի դեմ «պատ» ստեղծելու համար։ Ռուսական անօդաչուների՝ Լեհաստանի օդային տարածքը խախտելուց հետո ԵՄ–ն որոշել է ամուր պաշտպանական համակարգ ստեղծել միության սահմանների անվտանգությունն ապահովելու համար։ Բրյուսելը մտադիր է դիտարկել Ուկրաինայի մարտական փորձը։
Վերջերս ՆԱՏՕ-ի օդային տարածքը, մասնավորապես Լեհաստանի և Ռումինիայի երկնքում խախտեցին ռուսական անօդաչու սարքերը։ Այդ աղմկահարույց միջադեպերից հետո Եվրամիությունը մտադիր է օգտագործել մարտադաշտում փորձարկված ուկրաինական մեթոդները և իր արևելյան սահմաններին անօդաչուների դեմ, այսպես կոչված, պատ ստեղծել՝ հաղորդում է Financial Times-ը։
Պարբերականը գրում է, որ համեմատաբար էժան անօդաչու սարքերը ՆԱՏՕ-ի թանկարժեք տեխնոլոգիաներով որսալը ձեռնտու է Մոսկվային․ ըստ այդմ՝ անհրաժեշտություն կա փոխելու այդ մոտեցումը։
Վերջերս Բրյուսելը կոչ արեց անդամ պետություններին ԵՄ միջոցներով պաշտպանական համակարգեր ձեռք բերելու։ Համակարգեր, որոնք ցույց են տվել իրենց արդյունավետությունը Ռուսաստանի դեմ ուկրաինական մարտական գործողություններում։
Լեհաստանի օդային տարածք ներխուժած երկու տասնյակ անօդաչու սարքերից մի քանիսը խոցել էին ՆԱՏՕ-ի ինքնաթիռներ։ Դրանից կարճ ժամանակ անց Եվրահանձնաժողովի նախագահ Ուրսուլա ֆոն դեր Լայենը հայտարարեց, որ Եվրոպան պետք է անօդաչու սարքերի դեմ «պատ» կառուցի իր արևելյան սահմանին։
Նա այդ ծրագիրը նկարագրեց որպես համատեղ մշակված, համատեղ տեղակայված և եվրոպական ուժերի կողմից աջակցվող քայլ, նախաձեռնություն, որը հարձակման վտանգին կարող է արձագանքել իրական ժամանակում։
Եվրահանձնաժողովի ղեկավարը նաև հայտարարեց Ուկրաինայի հետ անօդաչու սարքերի դեմ դաշինք ստեղծելու մասին, որը Եվրոպային թույլ կտա օգտվել Ուկրաինայի հարուստ փորձից։ Նախագծով առաջարկվում է 6 մլրդ եվրո տրամադրել այդ նպատակին։
Մոտ մեկ շաբաթ առաջ ռուսական անօդաչու սարքերը խախտել էին Լեհաստանի օդային տարածքը: Անվտանգության ծառայությունները ընդհանուր առմամբ 21 անօդաչու սարք էին արձանագրել, որոնցից մի քանիսը խափանվել էին: Reuters-ը գրում է, որ զգալի թվով անօդաչու սարքեր Լեհաստանի սահմանը խախտել են նաև Բելառուսից:
Լեհական ռազմական ինքնաթիռներից բացի՝ անօդաչու սարքերը որսալու համար կիրառվել էին ՆԱՏՕ-ի անդամ այլ երկրների կործանիչներ: Վարշավան հայտարարել է, որ Ռուսաստանը միտումնավոր կերպով է հարձակվել Լեհաստանի վրա, ուստի, համաձայն Հյուսիսատլանտյան պայմանագրի 4-րդ հոդվածի, խնդրել է խորհրդակցություններ անցկացնել ՆԱՏՕ-ի դաշնակիցների հետ:
Լեհաստանի օդային տարածքը խախտելու միջադեպից հետո ՆԱՏՕ-ի գլխավոր քարտուղար Մարկ Ռյուտեն հայտարարել է դաշինքի արևելյան անդամներին պաշտպանելու գործողության մեկնարկի մասին: «Արևելյան պահակախումբ» կոչվող առաքելությունը կներառի տարբեր դաշնակից ուժեր և միջոցներ: Առաքելության մասնակիցների շարքում են Դանիան, Ֆրանսիան, Միացյալ Թագավորությունը և Գերմանիան:
Եվրոպական խորհրդարանի նախագահ Ռոբերտա Մեցոլա․
«Մենք կշարունակենք առաջին հերթին թուլացնել ռուսական ռազմական մեքենան՝ համակարգված և ուժեղ պատժամիջոցներով։ Փաստորեն, մենք աշխատում ենք պատժամիջոցների 19-րդ փաթեթի վրա, քանի որ բանակցությունները շարունակվում են։ Մենք կխթանենք մեր մարդասիրական, ռազմական և դիվանագիտական աջակցությունը Ուկրաինային և կխորացնենք մեր համագործակցությունը միջազգային գործընկերների հետ և ներդրումներ կանենք Ուկրաինայի տնտեսության մեջ»։
Մեցոլայի հետ համատեղ ասուլիսի ժամանակ Ուկրաինայի նախագահ Վլադիմիր Զելենսկին ասել է, որ ֆինանսական նոր աջակցություն է ակնկալում ԵՄ-ից․
««Ուկրաինայի առաջնահերթ պահանջների ցանկ» ծրագրի շրջանակում մենք մեր գործընկերներից ստացել ենք ավելի քան 2 մլրդ դոլար: Հոկտեմբերի ընթացքում, կարծում եմ, կստանանք լրացուցիչ ֆինանսավորում: Ընդհանուր առմամբ կունենանք մոտ 3,5 մլրդ դոլար: Դուք հարցնում եք, թե ինչ կներառեն այդ փաթեթները։ Ես չեմ բացահայտի բոլոր մանրամասները, բայց դրանք անպայման կներառեն Patriot և HIMARS համակարգերի համար նախատեսված հրթիռներ»։
Եվրոպական Politico պարբերականն էլ, վկայակոչելով դիվանագիտական աղբյուրները, գրում է, որ Եվրահանձնաժողովը կարող է Ռուսաստանի դեմ պատժամիջոցների նոր փաթեթի վերաբերյալ պաշտոնական առաջարկ ներկայացնել առաջիկա օրերին։ Մասնավորապես՝ նշվում է սեպտեմբերի 19-ից 22–ն ընկած ժամանակահատվածը։ Ըստ պարբերականի՝ ՌԴ–ի դեմ նոր պատժամիջոցներն ավելի խիստ են լինելու նախորդներից։
ՌԴ–ի դեմ նոր սահմանափակումների փաթեթը պետք է ընդունվեր դեռ մեկ ամիս առաջ, սակայն հետաձգվեց, քանի որ ԵՄ–ի ուշադրության առանցքում Հունգարիայի և Սլովակիայի նկատմամբ կիրառվող ճնշումներն էին, որոնց նպատակն է՝ նվազեցնել ռուսական նավթից նրանց կախվածությունը։
