«Արևելյան պահակը» կպաշտպանի ՆԱՏՕ-ի ամբողջ արևելյան սահմանը

ՆԱՏՕ-ի ուժերը կտեղակայվեն Լեհաստանի տարածքում

Անցած չորեքշաբթի օրը Լեհաստանի օդային տարածքում ռուսական անօդաչուների հայտնվելու և ՆԱՏՕ-ի ՀՕՊ համակարգի ուժերով ոչնչացվելու պատմությունն Էլ ավելի Է սրել հավաքական Արևմուտքի և Ռուսաստանի առանց այն Էլ լարված հարաբերությունները:

Լեհերն արձագանքել են, սահմանամերձ տարածքներում լրացուցիչ զորամիավորումներ և ոստիկանական հատուկ ստորաբաժանումներ տեղակայելով, Հյուսիսատլանտյան դաշինքի երկրներն ընդունել են խիստ հայտարարություններ:

Սեպտեմբերի 12-ին Էլ ՆԱՏՕ-ն նախաձեռնել Է Eastern Sentry, թարգմանաբար՝ Արևելյան պահակ գործողությունը, որի նպատակն Է հզորացնել արևելաեվրոպական անդամների ու, մասնավորապես, Լեհաստանի պաշտպանությունը:

Լեհաստանի նախագահ Կարոլ Նավրոցկին ստորագրել Է հրամանագիր, որով ՆԱՏՕ-ի ուժերն Արևելյան պահակ գործողության շրջանակում կտեղակայվեն այդ երկրի տարածքում:

Պատահականության վարկածը բացառվում Է

Ռուսական կողմը պնդում Է, թե դրոններով հարվածներ Է հասցրել միայն Ուկրաինայում գտնվող թիրախներին և լեհական որևԷ թիրախ չի ունեցել: Մոսկվան չի ասում, թե մարտական անօդաչուները սխալմամբ են հասել ՆԱՏՕ-ի անդամ պետության տարածք, քանի որ նման պարագայում ստիպված կլինի ներողություն հայցել կամ գոնե ափսոսանք հայտնել:

Ի՞նչ պատահականություն, մեկը-երկուսը լինեին՝ դեռ կընդունվեր պարզաբանումը, բայց երբ մարտական անօդաչու թռչունների մի ամբողջ երամ Է հատում օդային սահմանը՝ պատահականության վարկածը պարզապես ծիծաղելի Է դառնում:

Ռուսաստանի անզգույշ և անխոհեմ պահվածքը

ՆԱՏՕ-ն նաև օդային ուժեր Է ուղարկում Լեհաստան: Ռաֆալ տեսակի երեք ֆրանսիական մարտական ինքնաթիռներ շաբաթ օրվանից պարեկություն են անում լեհական օդային տարածքում: Ֆրանսիան Լեհաստան Է ուղարկել ոչ միայն օդանավեր, այլև դրանց անձնակազմը, սպասարկող թիմը և զինամթերքը:

«Անցած չորեքշաբթի օրը տեղի ունեցածը՝ մեկուսի դեպք չԷր, Ռուսաստանի անզգույշ և անխոհեմ պահվածքը մեր արևելյան թևի օդային տարածքում հետզհետե ավելի հաճախ Է դրսևորվում։ Մենք տեսել ենք ռուսական անօդաչուներ Ռումինիայում, Էստոնիայում, Լատվիայում և Լիտվայում։ Անկախ նրանից՝ միտումնավոր է, թե ոչ, դա վտանգավոր է և անընդունելի»,— ասել Է ՆԱՏՕ-ի գլխավոր քարտուղար Մարկ Ռյութեն:

Անցած շաբաթ օրը դրոնների հարցին անդրադարձել Է նաև ԱՄՆ պետքարտուղար Մարկո Ռուբիոն:

«Դե, շատ քննարկումներ են անցկացվում, դա չպետք է տեղի ունենար, չեմ կարծում, որ որևէ մեկը գոհ է դրանից։ Դուք տեսաք, թե ինչպես ՆԱՏՕ-ն համապատասխան կերպով արձագանքեց։ Մենք չենք ուզում, որ դրոնների պատմությունը կրկնվի: Դա անընդունելի, ցավալի և վտանգավոր զարգացում է»,- ասել Է պետքարտուղարը:

«Կինժալներ», «Ցիրկոններ» և «Իսկանդերներ»

Ռազմական առճակատման տրամաբանությունը շատ պարզ Է՝ ռուսները դրոններով հարվածում են Ուկրաինային, մոտ երկու տասնյակ ԱԹՍ-ներ հասնում են Լեհաստան, դրան ի պատասխան ՆԱՏՕ-ն սկսում Է «Արևելյան պահակ գործողությունը», որին ռուսները պատասխանում են «Զապադ-2025» կոդային անվամբ ռուս-բելառուսական լայնածավալ զորավարժություններով:

Ռուսները Բելառուսի տարածքում արձակում են Իսկանդերներ, մարտական օդանավերից պայմանական հակառակորդին Կինժալ տեսակի գերձայնային բալիստիկ հրթիռներով են հարվածում, Բարենցի ծովում մարտական նավերից Էլ Ցիրկոն տեսակի հրթիռներ են արձակում

Բելառուսում են ՆԱՏՕ-ի զինվորական դիտորդները

Պատերազմները հազվադեպ են ավարտվում զորավարժություններով, մինչդեռ զորավարժությունները հաճախ են վերաճում իսկական պատերազմների: Ի՞նչ անել, որ գործն արյունահեղության չհասնի: Միջազգային ընդունված գործելակերպը՝ զորախաղերին հյուրի կարգավիճակով հետևելն Է: Դրա համար հրավեր Է պետք:

Բելառուսները ՆԱՏՕ-ին առաջարկել են ժամանել և դիտարկում անցկացնել: Բելառուսի պաշտպանության նախարար Վիկտոր Խրենինն ամերիկացի զինվորականներին ասել Է, թե նրանք կարող են դիտել ինչ կուզեն:

«Ուրախ եմ, որ արձագանքել եք հրավերին և ժամանել, գնացեք ուր կուզեք, տեսեք ինչ կուզեք, խոսեք մարդկանց հետ, մենք թաքցնելու բան չունենք»,- ամերիկացի դիտորդներին ասել Է նախարարը: 

Բելառուս են ժամանել 23 երկրների դիտորդներ, ամերիկացիներից զատ ՆԱՏՕ-ից ներկա են նաև թուրքերն ու հունգարացիները: Բելառուսի զինվորականները սիրալիր են օտարերկրացի պաշտոնակիցների հետ:

ՆԱՏՕ-ն պաշտպանում Է իր տարածքի յուրաքանչյուր թիզը

Բարեկամական ձեռքսեղմումներ, հանգիստ աշխատանքային զրույցներ, հակակրանքի նշույլ իսկ չկա: Չի բացառվում, որ դա Վաշինգտոնի և Մինսկի հարաբերությունների որոշակի բարելավման հետևանք Է: Այնուամենայնիվ, Հյուսիսատլանտյան դաշինքը վերահաստատում Է, որ ռուսական հնարավոր ագրեսիայի պարագայում կդիմի ամենակոշտ միջոցների:

«Լեհաստանը և դաշինքի բոլոր քաղաքացիները պետք է վստահ լինեն, տեսնելով այս շաբաթասկզբին մեր արագ արձագանքը և լսելով մեր հայտարարությունները։ ՆԱՏՕ-ն կշարունակի պաշտպանել իր տարածքի յուրաքանչյուր թիզը, հայտարարել Է ՆԱՏՕ-ի բարձրաստիճան հրամանատար, ամերիկացի գեներալ Ալեքսուս Գրինկևիչը։