Իսրայելի արտգործնախարարը հայտարարել է, որ Պաղեստին պետություն գոյություն չի ունենա

Իսրայելի արտգործնախարար Գիդեոն Սաարը ԱՄՆ պետքարտուղար Մարկո Ռուբիոյի հետ Վաշինգտոնում կայացած հանդիպումից հետո հայտարարել է, որ Պաղեստինը որպես պետություն գոյություն չի ունենա, հաղորդում է Reuters-ը։

«Իսրայելի արտգործնախարար Գիդեոն Սաարը, չորեքշաբթի օրը պատասխանելով Պաղեստին պետություն ստեղծելու ծրագրերի մասին հարցին, ասել է, որ նման բան չի լինի», — գրում է Reuters-ը։

Պաղեստին պետությունը ճանաչվել է 147 երկրների, այդ թվում՝ Հայաստանի կողմից։ 2024 թվականին Միացյալ Նահանգները վետո է դրել Պաղեստինի ՄԱԿ-ում լիիրավ անդամակցությանը։

Ֆրանսիայի նախագահ Էմանուել Մակրոնը հուլիսի 24-ին հայտարարել է, որ Ֆրանսիան պաշտոնապես կճանաչի Պաղեստին պետությունը սեպտեմբերին ՄԱԿ-ի Գլխավոր ասամբլեայում։ Նա ասել է, որ նամակ է ուղարկել Պաղեստինի ինքնավարության առաջնորդ Մահմուդ Աբբասին՝ խոստանալով դա անել։ Երեքշաբթի Մեծ Բրիտանիայի վարչապետ Քիր Սթարմերի գրասենյակը հայտարարել է, որ Լոնդոնը կճանաչի Պաղեստինը սեպտեմբերին ՄԱԿ-ի Գլխավոր ասամբլեայում, եթե Իսրայելը չհամաձայնի հրադադարի և քայլեր չձեռնարկի Գազայում «սարսափելի» իրավիճակին վերջ դնելու համար։