Եվրոպական խորհրդի նախագահ Անտոնիո Կոստան կոչ է արել «հիշել Հիրոշիմայի սարսափը»: «Հիրոսիմայից ութսուն տարի անց աշխարհը երբեք չպետք է մոռանա միջուկային զենքի օգտագործման սարսափները։ Մարդկությունը մինչ օրս կրում է այդ սպիները», — գրել է նա X-ում՝ Հիրոսիմայի ռմբակոծության 80-ամյակի կապակցությամբ։
Կոստան նաև նշել է Եվրոպական Միության «խաղաղության և զինաթափման գործին անսասան նվիրվածության» մասին։
Ճապոնիայի հարավարևմտյան Հիրոսիմա քաղաքում նշվել է ԱՄՆ-ի ատոմային ռմբակոծության 80-րդ տարելիցը: Շատ փրկվածներ մասնակցել են միջուկային զենքի առաջին և դեռևս միակ մարտական կիրառման զոհերի հիշատակի արարողությանը:
Հիրոշիմայի քաղաքապետ Կազումի Մացուին նախազգուշացրել է ռազմական կարողությունների զարգացման և ազգային անվտանգության համար միջուկային զենքի օգտագործմանը հավանություն տալու վտանգի մասին՝ Ուկրաինա Ռուսաստանի ներխուժման և Մերձավոր Արևելքի հակամարտությունների ֆոնին, երբ ԱՄՆ-ն և Ռուսաստանը տիրապետում են աշխարհի միջուկային պաշարների մեծ մասին:
Նա կոչ է արել երիտասարդ սերունդներին գիտակցել, որ նման «սխալ քաղաքականությունը» կարող է հանգեցնել «բացարձակապես անմարդկային» հետևանքների իրենց ապագայի համար:
Ճապոնական Հիրոսիմա և Նագասակի քաղաքների ատոմային ռմբակոծությունները Միացյալ Նահանգների կողմից իրականացվել են Երկրորդ համաշխարհային պատերազմի ավարտին։ Հիրոշիմայի վրա նետված ռումբի պայթյունի հետևանքով, տարբեր գնահատականներով, մեկ օրում մահացել է 70,000-ից մինչև 100,000 մարդ։ 1945 թվականի վերջին զոհերի թիվը հասել էր 140,000-ի՝ վերքերից և ճառագայթումից հիվանդանոցներում մահացածների պատճառով։
