Իրանի նախագահ Մասուդ Փեզեշքիանը Ֆրանսիայի նախագահ Էմանուել Մակրոնի հետ հեղախոսազրույցում մեղադրել է Միացյալ Նահանգներին Իսլամական Հանրապետության վրա Իսրայելի հարձակումները համակարգելու մեջ։ Այս մասին ասվում է Իրանի նախագահի գրասենյակի կողմից տարածված հայտարարության մեջ։
«Ամերիկացիները բանակցությունների ընթացքում միշտ ընդգծել են, որ սիոնիստական ռեժիմը չի ձեռնարկի որևէ ագրեսիվ գործողություն առանց իրենց համակարգման և թույլտվության։ Հետևաբար, ակնհայտ է, որ ներկայիս հարձակումները իրականացվում են Միացյալ Նահանգների համակարգմամբ, որը հաստատել է այդ գործողությունները։ Եթե նրանք ցանկանային, կարող էին իսրայելական ռեժիմին դնել իր տեղը», — Փեզեշքիանի խոսքերն է մեջբերել գրասենյակը։
Նա նաև ասել է, որ Իրանը չի փոխի իր դիրքորոշումը իր միջուկային դոսիեի վերաբերյալ և չի բանակցի, քանի դեռ Իսրայելի հարձակումները շարունակվում են։
Էմանուել Մակրոնը X-ում գրառմամբ տեղեկացրել է, որ Փեզեշքիանին կոչ է արել հնարավորինս շուտ վերադառնալ բանակցություններին՝ «համաձայնության գալու համար, որը իրավիճակի լիցքաթափման միակ միջոցն է»։ «Մենք պատրաստ ենք մեր ներդրումն ունենալ և բոլոր անհրաժեշտ ջանքերը գործադրել՝ այդ նպատակին հասնելու համար»,- գրել է նա։
Մակրոնը միաժամանակ խնդրել է Իրանի նախագահին՝ «խուսափել իրավիճակի սրացումից»։
