Իրանի զինված ուժերը լիովին պատրաստ են Իսրայելի տարածքին ևս մեկ հրթիռային հարված հասցնելու, եթե հրեական պետությունը փորձի ուժ կիրառել Իսլամական Հանրապետության դեմ, հայտարարել է Իրանի բանակի գլխավոր հրամանատար Աբդուլռահիմ Մուսավին։
«Մենք լիովին պատրաստ ենք և կկատարենք մեր բոլոր նախկին խոստումները», — Մուսավիի խոսքերն է մեջբերել Tasnim գործակալությունը։
Նա ասել է, որ Իսրայելը չի կարող որևէ վնաս հասցնել Իրանին իր սահմանափակ ռեսուրսների պատճառով։ Մինչդեռ, Իրանն ի վիճակի է «մարտահրավեր նետել» Իսրայելին և նրա դաշնակիցներին, ընդգծել է Մուսավին։
Մայիսի 21-ին CNN-ը, վկայակոչելով հետախուզական տվյալներից տեղյակ մի շարք ամերիկացի պաշտոնյաների, հաղորդել էր, որ Իսրայելը պատրաստվում է հարված հասցնել Իրանի միջուկային ենթակառուցվածքներին։ Հեռուստաալիքի աղբյուրը նշել էր, որ նման հարձակման հավանականությունը վերջին ամիսներին զգալիորեն աճել է, հնարավոր է, որ հրեական պետությունը փորձի ուժ ցուցադրել՝ Թեհրանին ստիպելու համար զիջումների գնալ Վաշինգտոնի հետ բանակցություններում։
Իրանի և Միացյալ Նահանգների ներկայացուցիչները մայիսի 23-ին Հռոմում անցկացրել են Թեհրանի միջուկային ծրագրի վերաբերյալ բանակցությունների հինգերորդ փուլը, որում որպես միջնորդ հանդես է գալիս Օմանը։ Խորհրդակցություններից հետո Օմանի արտաքին գործերի նախարար Բադր ալ-Բուսաիդին հայտնել է, որ «որոշակի, բայց ոչ վերջնական առաջընթաց» է գրանցվել։ Ինչպես հայտարարել է նրա իրանցի գործընկեր Աբբաս Արաղչին, Թեհրանն ու Վաշինգտոնը պատրաստվում են բանակցությունների նոր փուլի և հույս ունեն, որ մեկ կամ երկու հանդիպման ընթացքում դրական արդյունքների կհասնեն։
